1. مرحبا بكم في أسواق ستي أكبر المواقع التجارية شعبية
    إستبعاد الملاحظة

رمضان مكاوي من العايدين قبل الزحمة

الكاتب: الدهليز, بتاريخ ‏31 يوليو 2011.

  1. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته
    الله يصبحكم بالخير جميعا
    ومن العايدين على الجميع
    يعني زمااااان لمن يجي رمضان ويضربو المدافع تلاقي الناس كلهم يعايدو بعض
    ويهنو نفسهم على ان من الله عليهم ببلوغ الشهر
    حتى اللي متخاصمين ومضاربين حتى لو لهم سنة مايهرجو مع بعض يجو ويسلمو على روص بعض ويعتزرو من بعض في المركاز حق العمدة
    مو علشان شي علشان رمضان كريم على قولهم وحتى ربنا يطرحلهم البركة
    يعني أبغى أسترجع بعض من هادي الشغلات بطريقة تانية من خلال سوقنا

    يعني صحيح نحنا أخوان وحبايب وأكترمن الأهل
    بس يعني برضو ساعات الواحد يهرج ويتناقش ويتكلم
    والا تندر كلمة كدة والا كدة والا يتم فهم الكلام بطريقة تانية يعني يمكن تسبب بعض المشاحنات والا الحزازيات بين بعض
    ياريت اللي زعلان والا اخد في خاطرو مني والا من أي شخص يدخل ويعتزر وويتسامح
    عملا بقول الله عز وجل ( لا خير في كثير من نجواهم الا من امر بصدقة او معروف او اصلاح بين الناس )
    وانا من جهتي مسامحكم كلكم من يوم ما شاركت في المنتدى الى يومكم هادا
    والله يرحم اللي ما انعاد عليه الشهر
    والله يشفي كل مريض حتى يصوم معانا الشهر
    والله يرد كل مسافر وبعيد الى بلدو او الى مكة يرمض مع اهلو


    سبحان الله رمضان طول عمرو موجود لكن نحنا هل نكون موجودين الله اعلم
    وكل سنة عن التانية بيختلف رمضان يعني رمضان اول غير رمضان دحين وكل شي اتغير وكل شي اتبدل

    لمن كان يخش الشهر الفضيل يضربو 21 مدفع ورا بعض بدون توقف وكنا نمبسط وننزغض ونفرح كتير بالصوت ونجري ونفجع بعض
    وخصوصا ازا كان اللي يدك المدفع معلم
    لأنو لازم ينحشي بالبارود مزبوط ويندك ويدخل بالعصاية الى القلب حقو علشان مايبقى
    نسمة هوا داخلو علشان لو فيه قليل هو تسمع الصوت ضعييييف يعني زي ما تقول فاسد
    وزي منتو عارفين المدافع
    مدفع للفطور والسحور وحق الموية برضو كان قوي علشان الناس تسمع

    اما المسحراتي كانت ايامو مرة حلوة وخصوصا لمن يدور قرب السحور وبالطلبة يدقدق ( اصحى يا نايم ) (وحد الدايم ) ( سحورك ياصايم )وكان يزهم باسم راعي البيت وبزورتو يالله يافلان يالله يعلان
    وكانت الناس قلوبها على بعض ويزهمو على المسحراتي ويعطوه من السحور حقهم يسير يتسحر معاهم
    واللي حرمة ولية جالسة في البيت تدلدل الزمبيل وتعطيلو الاكل
    وتاخد دعوة حلوة لانه الناس كانت ترقد
    مو زي دحين اللهم صلي على النبي صاحين ويبغالهم مرقداتي مو مسحراتي :021:


    المهم تلاقي الاهل والاحباب والاصحاب يتجمعو ويهنئو بعضهم
    واللي زعلان يتصالح ويتسامح علشان هو رمضان شهر البركة والتسامح فكل الناس تلاقي قلوبهم بيضا زي
    البفتة مافي لاحقد ولا حسد وكره على احد


    وتلاقي الحريم وبناتهم يستعدو ويبخرو الدوارق والمغاريف بالمستكة بعد ماينضفوها
    ويزينوها ويشتغلوها بالقماش والكلف والتطريز يعني شي يفتح النفس واللي يدها
    تاكلها تشتري طقم جديد علشان رمضان :ang:

    ويعبو الجلايل والليانات ويزبطو البيت من الى يسير في رمضان مايتعبو ويكونو مستعدين لإستقبال
    الاهل والاصحاب علشان فكوك الريق


    والناس خلاص قيد معبين ومقضين مقاضي رمضان كلها من اللحم والدجاج الى القمر الدين والماسية
    يعني من زمان كانو المعلمين والرجال يقوم عايدي يشتغل وعلى الضحوية يقضو ويبضعو للبيت خضرة ولحمة
    بحكم ماكان في تلاجات ولا برادات يعني كل يوم بيومو وربي لك الحمد والشكر
    يسير مايبقى على الرجال الا قرب المغرب يزل على الفوال ويشتري الفول ويروح على الفران ياخد له كعك
    وازا كان حران ينتشلو سوبيا قيد في البيت معبين السمبوسك وشربة الحب والقطايف والشغلات الطعمة
    ومن الاشياء الحلوة اللي راحت زماااااااااان
    من كتر ما الناس قلوبها على بعض
    الصفرة في المغرب وقت الفطور تلاقوها عمرااااااااااانة ومليانة اللهم صلي على النبي من كل شكل ولون
    بس ايش اللي عبى الصوفرة مو أهل البيت بالعكس :cnf3:
    الجيران يعني كل واحد يركب اكلة لازم يرسل لجارو ويفتكرو بصحن والا صحنين
    مو زي دحين نفسي نفسي لو ارسلت لأحد يقلعقلو ليش ارسلي هو انا فقير ماعندي حق اكلي
    والا يقول في نفسو ازا كان شكاك وموسوس يمكن حطلي سحر والا سم البعيد يبغى يقضي عليا ؟؟؟
    يعني الشهر كلو ماشاء الله صحون رايحة وصحون جية وغير الرسلات الى المساجد علشان الفقير والغلبان
    واللي عابر سبيل ماشي يجلس ويفك ريقو ويابختهم بالاجر
    نوقف هنا ونرجع نكمل معاكم ان شاء الله

    وما نستغني عن الحبايب وان شاء الله ارد عليكم ازا غلقت

    وفي وداعة الرحمن




     
  2. بنت الضيافة

    بنت الضيافة تاجر محترف

    إنضم إلينا في:
    ‏5 مايو 2010
    المشاركات:
    1,452
    الإعجابات المتلقاة:
    0
    وعليكم السلام ورحمة الله تعالى وبركاته
    الله يصبحك والجميع بلنور والهنا والسرور يارب
    من الفايزين ربنا يعيدوعليك بلصحة والعافية والستر وعلى كل اخواتنا واخواننا بمنتدانا الغالي يارب
    ويرحم اللي ماعادت عليهم الايام يارب الله يرحم موتانا وموتاكم وموتا المسلمين اجمعين يارب
    والله رمضان السنة داخل عليا ونا لسا مافقت من صدمت موت قريبي استغفر الله واتوب اليه
    الله يرحمو مات عمرو 29سنة العام الماضي لما كان عندنا على السحور كنت امازحو واقولو بنتك دي محجوزة لواحد من اولادي قلي ابشري بشرط يكرف عندي سبع حجج
    ويوم العيد كل سنة هوه وابوه يجو من الصباح يعيدو علينا قبل يروحو للمدينة استغفر الله العظيم معقول حبيب الكل راح
    يالله يا الله كان يجي كل سنة يحجز شقة تكون حول الحرم لجل العيلة ترمض فيها
    قسم ب الله احس بغصة في حلقي وجارتي كمان توها في شعبان متوفية وكانت في قلب العافية انا لله وانا اليه راجعون
    من جد الدنيا ماتسوى
    اتمنى من الجميع يسامحني ونا كمان يشهد علي ربي اني مسامحة
    ورمضان كريم علينا وعليكم وعلى الامة الاءسلامية اجمعين
    ايام زمان كانت حلوة لانو الناس كانت على طبيعتها نيتهم صافية ولو حصل شي بينهم بكلمة اعتذار
    وعتب بصيط تلقاهم خلاص نسيو اللي حصل وعلى قولتهم العتب صابون القلوب
    بس دحين الله المستعان حتى لو تعتذر يطالعو فيك بنص عين كانهم منيوم جابتهم امهم ماغلطو على احد
    الله المستعان
    اتذكر شوية من ايام المدافع لما كانت العوالي معظمها مزارع وماكان في تكييف كتيير زي دحين
    وصدقت والله الولدة كانت تقسم الفطور هادا لبيت خالتك فلانة وهادى لبيت عمك فلان
    وبلرغم من كدة ما يادن الى والصفرة فضلت خيركم عامرة من طبيخنا وطبخ الجيران
    وعاد اللي تكون حامل او نفاس امي الله يشفيها ويرفع عنها كانت تتوصى بيها فطور وسحوور
    بس المسحراتي ما اظن اني قد شفت مسحراتي في حياتي كلها مرررة ما اتذكرهم الله يجزاهم خير
    ____________________
    ربي يتقبل من الجميع الصيام والقيام وصالح الاعمال يارب
     
  3. سيدة الاعمال المستقبلية

    سيدة الاعمال المستقبلية تاجر مميز

    إنضم إلينا في:
    ‏12 نوفمبر 2009
    المشاركات:
    632
    الإعجابات المتلقاة:
    0
    الحمد لله الذي أحيانا فأوجد لنا مواسم للخير ونفحات للإيمان
    اللهم اجعلنا واياكم من الفرحين حين يقال:
    (أين الصائمون ليدخلوا الجنة من باب الريان الذي لايدخله أحد غيرهم)
    وفقنا الله جميعاًلحسن الصيام والقيام
     
  4. السلطانة مول

    السلطانة مول تاجر محترف

    إنضم إلينا في:
    ‏16 فبراير 2011
    المشاركات:
    1,710
    الإعجابات المتلقاة:
    0
    وعليكم السلام عمنا الدهليز
    وكل عام وانت بخير وصحة وعافية وكل اعضاء وعضوات المنتدى بخير
    فيك الخير لانك نزلت هذى الموضوع عشان الكل يتسامح من بعض
    وانا ايضا اطلب الاعتذار والسماح من اي شخص غلطت عليه سواء بقصد او بدون
    واسئل الله ان يبارك لنا في هذى الشهر الكريم ويكفينا شر مصائب الدنيا
    وارجو من الله ان ينصر اخواننا المستضعفين في فلسطين وسوريا وليبيا وان ينصر كل مظلوم يارب
     
  5. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    طبعا الزحمة والصرفدة وفورة الدم كلها في حلق المغرب تلاقو الشوارع زي المحشر من كتر الناس
    عند الفول والشربة والسمبوسك والتميس والسوبيا واللي حمش وعصبي يجلس في بيتو
    احسن ما يندر ويجرح صيامو ويفور دمو

    بعد صلاة العشا والتراويح تلاقو الرجال ينجمعو على المراكيز وهات يا هرج ومزح وبهللة
    علين ميعاد السحور بالزبط وقت المدفع حق السحور او حق الاكل مو المدافع وللمعلومية تلاتة انواع
    النوع الاول حق الفطور والتاني حق السحور والتالت حق الموية :021:
    عارفين حق الموية بالنسبة لمدفع الموية يعني حق الامساك ماأدري انتو بتسوو في بيوتكم زي زمااااااان ولا لأ :cnf3:
    قبل الادان ب3 دقايق تقريبا تشوف الناس ماسكة مغاريف الموية والكاسات وزي دحين القوارير
    علشان اخر حاجة يسوها قبل الادان شرب الموية وهادي برضها من العادات وبعضهم يقول من التخاريف والتباتيك حقت اول علشان اتعودنا لو ماشربنا موية قبل الادان رايحين نعطش يومنا كلو
    الحمد لله علين دحين مستمرة معايا هادي الطريقة تلاقيني قبل الادان ادور واقوم اللي نايم يالله قوم فز اشرب مويتك
    لا تعطش

    طبعا الصيام الاهل يعودو بزورتهم من صغرهم هو صحيح صيام من ورا الزير
    ويمكن يندرق على السقيفة وياكل جبنة وشريكة والا يفك تونة لكن مرة على مرة وسنة على سنة يتعود
    بالعكس اول كانو يعرفو البزورة اللي فاطرين وقت الادان حق المغرب تلاقي البزورة من غير شعورهم
    يمسكو سمبوسك والا بف ابو الجبن وعلى طول الاكل تعرفو انهم فاطرين :p5088:

    راجعلكم ان شاء الله في رمضان

    ومرحبابكم يللي انستونا وشرفتونا
     
  6. الحرف الحر

    الحرف الحر ....

    إنضم إلينا في:
    ‏13 يناير 2011
    المشاركات:
    281
    الإعجابات المتلقاة:
    0
    كل عام وانت بصحه وعافيه لك اخوي العمده ولاعضاء وادارة المنتدى الغاليين.والله لا يجيب الزعل بيننا .
    حدثنا عبد الله بن مسلمة، عن مالك، عن أبي الزناد، عن الأعرج، عن أبي هريرة رضي الله عنه: أن رسول الله صلى الله عليه وسلم قال: ( الصيام جنة، فلا يرفث ولا يجهل، وإن امرؤ قاتله أو شاتمه، فليقل إني صائم - مرتين - والذي نفسي بيده لخلوف فم الصائم أطيب عند الله تعالى من ريح المسك، يترك طعامه وشرابه وشهوته من أجلي، الصيام لي وأنا أجزي به، والحسنة بعشر أمثاله ا). رواهـ البخاري.

    في رمضان...
    أغلق مدن أحقادك
    واطرق أبواب الرحمة والمودة

    فارحم القريب وود البعيد

    وازرع المساحات البيضاء في حناياك

    وتخلص من المساحات السوداء في داخلك.

    ((اللهم انك عفوا كريم تحب العفو فاعفو عني.))
     
  7. A7la 3yoon

    A7la 3yoon تاجر مميز

    إنضم إلينا في:
    ‏17 يوليو 2011
    المشاركات:
    110
    الإعجابات المتلقاة:
    0
    كل عام والجميع بالف خير
     
  8. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته
    الله يمسيكم بالخير
    كيفكم مع الصيام والجووو الرستكة
    يارب لك الحمد والشكر
    هو كدة اول يوم فيلو مطبات على قولهم لحد ما الجسم يتعود ويولف

    قصروو

    رمضان كانو اهل اول وعلين دحين في ناس يقسموه تلاتة اقسام
    العشرة الاولى للجزارين ( يعني يشترو اللحم والدجاج والمقاضي وكل طلبات الاكل والشرب حقت الشهر )

    والعشرة التانية للخياطين ( تلاقو الزحمة عندهم علشان تفصيل تياب الرجال وكرت الحريم ودحة البزورة :021: )

    والعشرة التالتة للحلوانية والحلاقين ( عاد يقرب العيد ويعبو الحلويات اللومنية والحلقوم وابو بقرة واللدو واللبنية )
    واخر ستة او خمسة ايام الزحمة عند الحلاقين يقصقص ويزبطو خلقتهم علشان العيد

    سبحان الله من ضمن كلام اول يقلكم ( ازا عشر بشر ) :clapinghand:
    يعني لمن تمر اول عشر ايام من الشهر على طووول تلاقيه يتقلفط ويمشي بسرعة

    ومن الحاجات الحلوة حقت رمضان الاكل بعد التراويح او بالاصح النقنقة
    لانه مع الصلاة والقيام الواحد يحس بالجوع
    لانه في المغربية كلها لقمتين ونقول الحمد لله
    وكانت منتشرة بسطة الكبدة وبسطة البليلة كمانة لها طعم في رمضان
    وبرضو كمانة ازا صادف موسم الحبش كمانة شي بالمرة طعم وخصوصا ازا كان مشوي على الفحم
    والبياع لازم يكون زكي شوية ويعرف كيف يجرجر الناس غصبا عنهم علشان ياكلو
    كيف :cnf3::cnf3::cnf3:

    لنا رجعة معاكم ان شاء الله
    دحين الناس مدروخة مع الصيام لمن تفكو ريقكم وتبلو قلبكم
    شاركونا وفي امااااااان الله

     
  9. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته

    الله يصبحكم بالخير جميعا

    الحمد لله مشي اول يوم على خير على الجميع
    ولو حصلت شوية لخبطة في الجسم بس اتعودنا
    والله يتقبل من الجميع

    نكمل هرجة البسطات الحلوة

    الفـــول النابت والترمس

    الفول النابت ( المدشوش ) اللي بقشره ينسلق مزبوط وبعدين يتقشر ويغمسوه في ملح الدقة
    والمسلوقة يرمو عليها فلفل اسود وكمون ونص ليمونة ويشربوها حارة حارة تغسل الصدر على قول داك

    والترمس زي حبات البليلة لونها اصفر في منو نوعين شي حلو وشي مالح او فيلو مرارة بسيطة كانوا يغمسوه في ملح الدقة وياكلوه

    البلـيلة

    ( بليلة بليلة .. بليلة بللوكي .. و سبع جواهر خدموكي .. وبالشطة حدقوكي وبالطرشي زبطوكي وبالخل مزمزوكي
    علشان الحلوين يدوقوكي ) بلل بلل ياولد
    طبعا كل مين يتفن في الاغاني والاناشيد علشان البزورة يسمعوها ويمبسطو منها وتحببهم في الاكل
    مو زي دحين النفس رتعة البعيد والله لو جلس الادمي يغني الحب كله محد يقلو ايش عندكم والا ايش بتبيع

    وكان كل مين يتفنن في البليلة اللي يسويها سادة واللي يحط عليها جزر وخيار وناس تحط قتا وكوسة مكعبات واللي يحط عليها
    بطاطس مهروسة واللي يشططها بالشطة التكروني يعني كل واحد وصنعتو والمعلمانية حقتو

    احيانا ما تنحكر معاهم وتطلع زي الحجار قاسية مو هادي البليلة شغلتها شغلة
    يبغالها بل بالموية نص يوم وبعدين تنحط على النار حتى تستوي وتتمخمخ مزبوط على طبيعتها
    واللي مستعجل يحطلها كربونة والا خميرة بطرف الملعقة يسير تنهري من الاستوا
    وبسم الله ناكل الصحن ونطلب التاني والتالت
    والبياعين كانت نفسهم حلوة ساعات يشوفك لمن قرب يغلق صحنك يرميلك كفكير بليلة وصاية من عندو

    محسوبكم بياع بليلة كنا نبسط في برحة بنجر في الشااامية مع خاااالي
    الله يرحم ديك الايام على خير
    واختنا شهرزاد كانت تشتري مننا شكلو والله العالم :p5088:

    راجعلكم ان شاء الله نكمل معاكم
    وفي اماااااان الله
     
  10. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته

    مساكم الله بالخير

    والحمد لله ربنا كشفها غمة عننا ببركة الشهر الفضيل
    العج والغبرة اللي كانت موجودة راحت في حالها

    والله يعيننا اجمعين على الصيام والقيام وصالح الاعمال

    نكمل الشويتين اللي بقيت

    المنفوش

    اللي مايعرفو هو الكربو لمن يكبر ويسير رجال :p5088:

    زي الكربو ويمكن اطعم منو حبات مدورة وكبيرة وبالزات حق اليمنة مقرمش كنا ناكلو حاف والا نوديه للبيت ونملطو بالجبن الكشكبان
    وقليل شطة للتحديقة يسير طعمو تكتكة على قولهم
    دحين في المنفوش المستهلك يسوي منو لكن مو زي طعامة حق زمان

    وطعامته في ساعته لانه لو جلس يومين تلاتة خلاص يجلد وتروح القرمشة منه

    الحبش

    وازا كان رمضان صادف موسم الحبش ( الدرة ) كان منجد روعة وخصوصا ايام الهوا والبرد السكاتي
    يجيب الكانون الفحم ويرص الحبش اللهم صلي على النبي من اول الكانون لأخرو
    وهنا تجي المعلمانية وهيا كيف تجيب الزباين :cnf3:


    كان يلم الشعر حق الحبش ويكومو جمبو
    وكل فترة والتانية يرمي خمشة على الفحم :clapinghand:
    يسير لمن يولع البعيد تلاقو الريحة شاااامخة وتنخشش في الدماغ وتجري جري تدور عليه

    وتلاقي الناس متكومين على الكانون وكل مين يحجز هادي حقتي وهديك حقتك يقعدو
    يراقبوها من ساعة ماتتقشر علين لمن تستوي :D

    وزي منتو منتو عارفين الحبش كل مايكون صغار زي اصابيع الجنية كل مايكون طعم وممخمخ
    ويمديكم تختبروه والحبة بقشرها تتكو بضفركم على الحبش ازا سالت المرقة حقتو
    تعرفو انو جديد ومزبوط ولعلمكم الحبش نوعين في الاصفر هادا حلو وفي الابيض وهادا العايدي او المالح

    راجعلكم وفي وداعة الرحمن




     
  11. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها

    الدندرمة

    الدندرمة او الاسكريم تباتيك زمااااااااااااان
    كانو يسوو جك عصير توت يشربو اللي يشربوه بالعافية واللي يزيد ينكتوه في زنابيل نايلون صغيرة ويسووه
    زي المسلس ويجمدوه وبعدين لمن يخرجوه يخرقوه بسنونهم ويجلس يلحسو ويمصمصو في الايسكريم

    طبعا هادا الكلام لمن كانت التلاجات والفريزرات

    زماااااان كانت في مكاين تمباع يسوو بيها الايسكريم زي منتو عارفين لا فريزر ولا هباب
    هادي المكينة ياحبايبنا زي السطل او البرميل

    فيلها مكان يحطو بطنو قوالب التلج طبعا التلج يشتروه قوالب جاهزة
    من الكعكي او واحد ناسي اسمو
    المهم لمن ينكتو التلج ويحطو عليها النكهات اللي يبغوها اللي يبغى توت واللي يبغى برتكان واللي يبغى ليمون
    واللي يبغى بالحليب مع الهيل وبعدين المكينة لها يد زي الهندل يجلس يبرم يبرم يبرم ويدور علين يتهروش التلج
    وينخلط مع العصير مزبوط يرمي كمانة خمشة سكر وقليل ملح وبعدين يفرغو في الزبادي او القراطيس
    يعني لغوصة في لغوصة بس شغلهم نضيف وطعم



    ايش بقيلنا كمانة اللهم صلي على النبي

    الكبدة

    بسطة الكبدة وياعيني على الكبدة وخصوصا لو كان اللي ورا الصاج معلم
    المهم من الصبح يقوم الرجال ويروح للجزارين او السلخانة ويشتري الكبدة طااااااااااازة بدمها
    يغسلها وينضفها ويرستكها ويقطعها شقف شقف نحيفة وبعدين يرمي عليها تلج علشان ماتخرب وتريح علين الليل
    ويسوي كمانة سطل خل مع الموية والتوم والفلفل للتحديقة
    ويمر كمانة على الفران وياخد منو عيش حب يعني ماشاء الله يشتري حق 20/30 قرص

    وبسم الله بعد التراويح يجيب الكانون حق الفحم والا الدافور ويحط الصاج ويرمي الكبدة ويشوحها على النار
    واللي يبغاها سادة واللي يبغاها بقوطة واللي يبغاها ببصل واللي يبغاها بفلفل كلو موجود حسب الطلب
    بس سر الكبدة قلبتين والتانية وقيدها في الصحون مغروفة لأنو لو جلس يقلقل ويطبخها على النار تسير مجحشة وقااااسية
    وتتمضغ زي اللبانة وبعدين تبور في خلقتو يايصدقها والا يعطيها للبساس ( مو بساس اول كانوا انتيكة الناس يربوهم على الغالي , والله كنا ناكل وكانوا يجلسو جمبنا ترميلهم لحمة يمرمشو فيها
    كبدة ولحم ودجاج وسمك ) مو زي بساس دحينة حونشية الله اكشف حالهم ياكلو فيران وصراصير الله يقرف الشيطان :ang:


    راجعلكم ان شاء الله

    شكلو رمضان مسوي العجببببب معاكم

    وفي اماااان الله



     
  12. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    غير بسطة الشاهي بالحليب او حليب مع النص كافر

    يعني زي منتو شايفين كل الاكلات والطافوحلي شغل مكاوي بيدهم وبنفسهم لا اجناب ولا صبيان
    وماعندهم عيب والناس ايش تقول :ang:والناس ايش تدحل كانوا الاهل بدل مايخلو بزورتهم داشرين ومصرمحين :214:


    يقولولهم يالله ياواد تعال ابسطك بسطة في الزقاق انا اديك المونة وانت خد الباقي
    وكانوا البزورة يلملمو الفلوس علين لمن تتكوم وتجي حسبة يروحو يشتروبها اغراض وكراكب لهم :clapinghand:
    ويخلوهم يعتمدو على نفسهم

    اللي يجيب بوسكوليتة واللي يجيب دباب طبعا الاب يساعد شويتين مع الولد
    بس المهم انو الولد اتعلم المرجلة ونفع نفسو واعتمد على نفسو يسير مايقعد زي صجو بياع اللدو والا زي الضرب على الركب :p5088:

    مو زي دحين كترو البياعين المتجولين في كل شارع وتلاقي الواحد قلبو متوغوش من اكلهم ومنت داري نضيف والا مو نضيف

    مرة كنا بنشتري بليلة مدري في عرفة زمااااااااااااااااااان
    جالس البرماوي الله يكشف حالو يغرف في الصحون وجالس يعطس
    طيب دير خلقتك على الجهة التانية عساك بالكتمة البعيد بس شوفنا المنظر هادا انصدت نفسنا الله يصد نفسو
    والا غير نفسهم الرتعة والضيقة يحطلك نص كفكير بليلة ويلغ الصحن خضار وخل علين
    يجيبلنا الحموضة والقداد
    تقلو اتوصى يقلك خلااااااص

    الله يرجم معلمين وصبيان زمان
    لو شافو بنت والا ولد صغير يدحلسوه بالكلام ويتوصو في الاكل والشرب
    وازا مد يده واخد حاجة يقلك خلاااااص بالعافية نفسه اشتهت
    وازا قلتلو اتوصى يشيل ويحط بدون ميزان

    النفس حلوة والرزق بكترة ويارب لك الحمد والشكر

    طبعا لمن يجوو الرجال ويتكو في مركاز العمدة
    ماشاء الله قلوبهم نضيفة وحلوة كل واحد جي للمركاز يجيب معاه من البيت اللي موجود هادا يجيب قطايف والتاني يجيب كنافة وهداك يجيب بسبوسة واللي يجيب بريك او بف يعني زي ماتقولوا كل مين يدوق التاني من شغل البيت حقهم

    اااااااه على زمن فين الكلام هادا كلو راح
    دحين البسطات يمكن انقرضت او صارت قليلة وفين وفين حتى تشوف بسطة ييمكن علشان جات الكفتريات
    والدكاكين اللي تبيع الحلويات والحبش وووو
    الناس معد صارت تبسط ولا شي وحتى لو بسط طيب ازا باع شويتين هادا ازا ماصدق الاكل من اصلو


    وبكدة انتهينا من رمضان وتباتيك الشهر الفضيل
    واكيييييييد عندكم حكايات ومغامرات ونوادر في الشهر الفضيل
    والمجال مفتوح لكم تنورونا وتشرفونا
    نشوف المكاوية ايش عندهم

    ليا رجعة معاكم وفي امااااااااااان الله
     
  13. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    والله الجو ملخبط والواحد حيله مهدود وبدنو طاااايح

    نتقابل ان شاء الله على خير وفي امااااان الله
     
  14. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته
    الله يسعد ايامكم على خير في الشهر الفضيل

    مرحبابك ياستي بنت الضيافة
    انستي ونورتي وكل سنة وانتي طيبة

    ياستي ياااااالله العودة اازا عافاك اغناك والحمد لله على العافية
    وعظم الله اجركم يا ستي
    ايش نسوي هادا حال الدنيا
    كتير من الحبايب اتوفو الله يرحمهم

    اتنين من قريباتي ماتو خلال الخمسة الشههور اللي راحت
    والدنيا محلصة بعضها

    والحمد لله ربنا طول اعمارنا وبلغنا الشهر الفضيل
    هادا موت الفجاة ياااستر
    تسمعي فلان والا فلانة في قلب العافية تصبحي ماتلاقيهم

    يالله راجعلكم ان شاء الله ونكمل الرد معاكم
     
  15. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    جزاك الله خير على الروح الحلوة والمسامحة
    يعني نبغى الناس على القليل في الشهر الفضيل
    يدعسو على قلبهم شوية ويجو على نفسهم ويتسامحو ويتراضو فيما بينهم

    زي هادي الايام فرصة الناس كانت تستغلها في المصالحة والمسامحة
    وبروضو كمان من الفرص الاحزان البعيد يعني وقت الموت
    اللي له قطيعة او زعل مع واحد وراح يعزيه اللي زعلان مايقدر يرده وحيسلمو على بعض
    ويتسامحو

    وربي يعطي امك الصحة والعافية ويخليها شمعة فوق روصكم

    دحين ياستي كل الناس ماشاء الله عندهم اكل وشرب واصلا العلاقة بينهم وبين الجيران
    معدووووومة الا مارحم الله كل واحد ينزل من البيت على السيارة
    ومن السيارة على البيت
    وبعضهم يزل من قدامك وجمبك لا سلام وكلام
    مسوي على قولهم شديد وعلشان الناس لاتاخد وش :ang::ang::ang:

    ايت وش وايت قفاااا
    كل مين الحمد لله مستور وفي نعمة والله لا يحوجنا الا لوجه الكريم بس الجيرة حلوة لمن تكون
    معروفة ويتداخلو فيما بينهم

    قبل كم شهر جارنا انحرق بيته وماكان مو جود وكان بايت عند ارحامه
    والجيران الله جزاهم خير هم اللي دقو على الدفاع المدني
    ولمن جو المطافي يبغو ناس يعرفو الجار علشان يخشو البيت
    عاد خشيت انا وكم نفر قلنالهم هادا زي اخونا وخشينا معاهم


    وواحد من الجيران برضو صار ماس كهربائي في الطبلون
    ومافي الا حرمته وحامل
    فكت الباب مع الفجعة وصرخت ودقت على جوزها
    وجوزها دق على واحد من الجيران خش البيت وطفى النار في بدايتها وندر

    والله لا يحرمنا من الجيرة الحلوة

    وزي ماقال المسل
    :clapinghand::clapinghand: جارك القريب ولا اخوك البعيد :clapinghand::clapinghand:

    وفي امااااان الله
     
جاري تحميل الصفحة...

مشاركة هذه الصفحة