1. مرحبا بكم في أسواق ستي أكبر المواقع التجارية شعبية
    إستبعاد الملاحظة

شعبنة مكاوية مرستكة

الكاتب: الدهليز, بتاريخ ‏12 يوليو 2011.

  1. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته
    مساكم الله بتوب الكعبة

    اللهم بارك لنا ولكم في شعبان وبلغنا رمضان
    كيف حال حبايبنا أن شاء الله تكونوا بصحة وعافية
    هيا اتحمدو الله وبوسو يدكم وش وقفا



    اليوم موضوع زي ماتقولوا يهمنا معشر المكاوية بصفة خاصة بحكم انها عادة والله لايقطعها من عادة
    اتعودنا عليها من الصغر علين الكبر وعلين الأجيال اللي بعدنا أن شاء الله صحيح العادة هادي أتغيرت بحكم تغير
    الزمن وتغير الحاجات المحيطة بنا من الى
    لكن الشعبنة موجودة حتى لو أتغيراسمها أو مكانها أو نوعها

    الشعبنة

    هادي عادة من عادات اهل مكة ربي يعمرها معروفة من زمااااان
    تقريبا من أيام ما فنو الاوادم !!! :cnf3:

    وبالعنية نزلت الموضوع دحين وهادا وقتو المزبوط يسير الكل ياخد بالو من الموضوع
    ويعبوا نفسهم للشعبنة لانو في ناس تشعبن مرة وناس مرتين وتلاتة
    وناس تشعبن لحالها وناس مع أصحابها يعني طلعات رجال وشباب


    وقت الشعبنة

    طبعا الشعبنة ما تحلى إلا في العشر الأواخر :p5088:

    مو حقت رمضان لا حقت شعبان
    يعني كل ما تكون متأخرة كل ماتكون حلوة وطعمها طعم ولها نشأة حلللوة

    وبعض الناس يشعبنو مرتين لعلمكم
    مرة شعبنة مع الأهلية والأرحام
    ومرة شعبنة عزابية يعني شغلات رجال وشباب لحالهم

    تعريف الشعبنة

    والشعبنة هيا نوع من التمشية والتسلية والترفيه
    مع انو الكم اليوم هادي طلع اللي يقول الشعبنة هادي مالها اصل واللي يقول بدعة واللي يقول كلام فاضي
    ويفكر إننا جالسين على محرمات ناكل خنزير ونشرب خمور وطرح تـتربط على الوسط

    اللي مايعرفها مزبوط يسأل احسن ما يفتي من راصو :ang:
    ويكره الناس في دنيتهم وعيشتهم

    نحنا بننجمع مع الأهلية والأرحام في إي مكان للتمشية والسمر والتسلية ما اقول كلنا ملايكة معصومين
    في والله بعض الناس يشعبنو على طريقتهم وبعضهم يندرو بلاد برا يشعبنو ومالنا ومال بيهم الله يستر عليهم ويغفرلهم

    لكن زي منتو عارفين القصد من الشعبنة ازا خش رمضان ( الله يبلغنا وإياكم ) معد فيلو الواحد حيل ونفس يندر من البيت
    للتماشي والطلعات أصلا رمضان شهر من عند الله فيلو روحانية وعبادة وطاعة وبركة قيدو شهر في السنة ويااااااااالله العودة
    يادووووب الواحد يصوم ويصلي التراويح ويختم القران ومافحالو الواحد يتمشى ولا يدّحل


    مكان الشعبنة

    الشعبنة إما جدة والا الهدا والا عرفة ومزدلفة
    وكمانة الأقدم منها الوادي وادي فاطمة والا الجموم جعرانة والا بير الغنم الزيمة العابدية والبساتين المنتشرة في مكة الله يعمرها اشهرها بستان الزاهر
    مكان ملاهي بدر والتلفزيون سابقا وبستان المسفلة بركة ماجد
    مكان البلدية دحين يعني على ضواحي مكة
    طبعا زي منتو عارفين أول كانت كلها مزارع وخضاااااااااااار الواحد من جد قلبو ينشرح
    طريقة الشعبنة
    طبعا يتلمو قيلة ( يعني في الضهر ) وبالزات لمن يكون الجو حلو بارد مو زي اليومين هادي رطوبة وزمطة ولسلسة العرقان تصبصب زي البزبوز طبعا يتـفـقو قبل كم يوم ويحركو من بدري علشان يمسكو محل مزبوط
    وكل بيت يجيب معاه اللي ربنا يقدرو عليه من أكل وشرب وطافوحلي وليانات وحنابل والعاب وووو
    ويجيبو الشراشف وينقو اكبر سجرة ويفرشو تحتها علشان الفية والضلة ويفرشو الحمبل ويربطو الشراشف
    علشان الشمس ماتصرعهم البعيد
    وبرضو كمانة علشان الكشف يعني
    وياخدو معاهم طلي بس يكون حي يسير يشعبن معاهم ويشوف الدنيا قبل ما يتكل على الله :021:


    القصد لمن يجي الليل يحطوه على القبلة وبسم الله
    ويسوو منو هداك القدر حق الزربيان ويسوو مقلقل وسلالي وشوية كبدة على الصاج يشوحوها
    واوصال لحم على الفحم
    مع زلطة الطحينة وقرص عيش حب ابو الحبة السودة والشمر
    ويتشلوط على السريع على نفس الطاوة المنغنغة بريحة المشاوي
    ياسلااااااااااااااااااام شي رجج :clapinghand:
    زي ما تقولو نقـنقة علبال ما ينحكر القدر

    طبعا الحريم والستات الكبار يهتمو بالطبيخ والنفيخ
    مكتوب عليهم الشقاااا وحتى وهم برا البيت
    والبنات القطع الشباب يعني يعطوهم الزلطات يتلهو فيها ويسووها


    راجعلكم ان شاء الله
    ولمن اخلص الموضوع بالكامل والكامل وجه الله ارد عليكم
    واللي من بيت المستعجل مرحبابه يرد

    وفي امااان الله
     
  2. بنت الحسب

    بنت الحسب تاجر مميز

    إنضم إلينا في:
    ‏14 مارس 2011
    المشاركات:
    999
    الإعجابات المتلقاة:
    0
    من جد عاده حلوة وخاه انها صله رحم ومافيها تداخل مع الدين هذي عاده من عاداتنا يعني بالعربي صله رحم قبل رمضان لان رمضان كل واحد بينشغل بالعباده وتقل فيه الخرجات والتماشي
    الله يجمع المسلمين على الخير والطاعات
     
  3. احساس الغلا

    احساس الغلا &.غايتي عزة أمتي.&

    إنضم إلينا في:
    ‏6 سبتمبر 2009
    المشاركات:
    1,329
    الإعجابات المتلقاة:
    0
    الإقامة:
    Makkah
    اي والله فين وفين بس نشوووف الجماعة حقتنا
    غير وقت المناسبات الكل مشغوووول في دنيتو..
    ومتى بس الواحد يفضى غير هذي الأوقات ..
    احنا شعبنّا في الاستراحة جمعنا الأهل والأصدقااااء تدروووا عاد البيت يدووووب
    يكفي العيلة الكريمة ..
    والله كان الخرجة فلللللللة .. شووووينا اللحم والدجاج وكمان سوينا (ساااتي) آكلة مشهورة لجنوب شرق أسيا.
    أهم شيء كلنا بسطناااا .. اللهم بارك لنا في شعبان وبلغنا رمضان واحنا في أحسن حاااال ..
    ودمتم سالمين .. ومشكوووور أخي الدهليز على طرحك للموضوع.
     
  4. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته

    الله يسعد لي صباحكم بكل خير يااارب
    ونشكر الحبايب اللي شرفونا اليوم
    وان شاء الله متى ما غلقنا الموضوع ارد عليكم

    طبعا في الشعبنة مو شرط انهم يدبحو طلي كل عايلة حسب استطاعتها ناس احيانا يخلوها
    دجاج
    وناس تمشيها فول وتميس وناس تدردب تعتيمة خفيفة
    مايدقـقو هم جيين يمبسطو ويفلكو عن نفسهم والا جيين علشان الطافوحلي
    واللي مستور على قد حالو ما يحرجوه ويقولو فين الباي او القطة
    يسوو الهرجة كانها فلان عازمنا وهو متكفل بالمصاريف :clapinghand:
    او انه واحد يشيل عنه الباي من غير مايدرو بقية الناس

    بس اغلب الناس أول زي منتو عارفين غرااااامهم تربية الطليان والدجاج
    فيجلسوا يربو ويضرموا الطلي علين يمسك حيلو ويتربرب بعدين يرفعوه للشعبنة
    واللي بدو يشعبن على اكلة سمك والا جاوي كل مين على حسب مراقو ومطنو وتصنيفتو زي ما بنسمع اليومين هادي

    المهم يسمرو لقريب الصبح طبعا زي منتو عارفين أهل أول غراااااااااامهم الضومنة والكيرم البرجون والكبوش والصوقيطة والاصطفت
    خصوصا أنا أموووووووت في الكيرم
    وازا كان فينا حيل وخصوصا الشباب يدقوكوووووورة وازا كانت
    الشعبنة رجال يميلو شوية على المزمار

    بس وفي الاخير بعد مايغلقوا من اللعب والنطنطة والبرمان
    يجي وقت طق الحنك وخصواالنكت ( اللي بالي بالكم ) ;)
    والبهللة والمقااااالب ماتحلا الا في الليل مع براد الشاهي
    المنعنش والا إن كان الجو باااااارد نسوي قدر السحلب ونخليها ألم نشرح بس أول شي نصرف البزورة والا نرقدهم :021:


    والحريم طبعا أصواتهم تلعلع اللهم صلي على النبي
    فلانة فيها وفلانة يخطيها حتى في التماشي مايبطلوعادتهم والحش حقهم واشترينا فساتين واشترينا دهب هادا هرجهم زي ماهو علين تقوم القيامة :ang:

    ياسلام على أول وبساطة زمن أول على قد ما كانت الدنية بسيطة وماشية باللززعلى قد ما كنا نفرح ونمبسط ونتسلى ومحد شايل في قلبو على أحد
    مو زي دحين
    الناس صارت تكره الشعبنة والمصيبة أهلية في بعضهم وحتى لو جوو مجاملة
    والا من ورا قلوبهم زي المغصوبين
    وكل مين مادد بوزو شبرين ويتقعدو لبعضهم في الكلام ويقولوا فلانة قاعدة زي بقر الحرام مافزعت معانا ولا عبت الصوفرة
    ولا سوت الزلطات وغيرالبنات مو جايبين خبرها دوبهم في الجوالات والفورة والهرج الفاضي والشغل أترمى على الخدامات والحريم جالسين في طق الحنك


    حتى البزورة كمانة معد صارو يحبو لا شعبنة ولا هباب
    يقلك اقعد في بيتي العب كومبيوتر واتاري احسن من التماشي اللي زي وشكم قال ايه افرد فرشة على التراب
    واشم هواااا مواجلس في الحوش حق بيتنا احسن :confused:
    والله بيني وبينكم تبغوا الصراحة معاهم حق
    الأشياء اللي كانت تبسطنا وتسلينا زمان
    بالنسبة للجيل الجديد صارت تغمبج قلوبهم وتطفشهم
    دحين يبغوا يشعبنو برااااا وناس على الكباين وبيوت البحر

    يعني الكلام يطول ويطول لكن هادي هيا الشعبنة باختصار

    ايوا افتكرت حاجة قبل ما اروح الشعبنة ازا صادفت ايام حر ورطوبة ولسلسة وزمطة
    زي هادي الايام يخلوها في البيوت يعني عشوة صغيرة
    وبعضهم يروحوا لسطوح مكة ( الهدا ) الله يهد عافية الشيطان

    باقي نتكلم عن شعبنة البحر ونغلق الموضوع
    ونترك المجال للحبايب يطرشو الكلام اللي عندهم

    وفي وداعة الرحمن
     
  5. miss.cherry

    miss.cherry تاجر

    إنضم إلينا في:
    ‏19 ابريل 2011
    المشاركات:
    65
    الإعجابات المتلقاة:
    0
    والله ضحكتني يالله فعلن دحين معا الحر الواحد مو طايق نفسو ايت هوا اللي نخرج ونجلس فيه
    لكن هوا مو شرط يفرشو عالتراب وكدا يعني لو تمشيه وخرجه حلوا في مطعم ولا ملاهي توفي الغرض وكمان سارت تقتصر على اهل البيت مو زي زمان كل العيله
    وخرجة الهدا حلوا كمان وامبساط معا الهوا ينخنش فينا بدل السلخه اللي عايشينها الله يرحمنا بس ولسا ف رمضان كيف

    ربي يوفقك ويعطيك العافيه وتمبسط يلا بشعبنتك :)
     
  6. @حسام@

    @حسام@ أبو عبدالعزيز

    إنضم إلينا في:
    ‏27 يونيو 2009
    المشاركات:
    612
    الإعجابات المتلقاة:
    0
    هههههههههههههههه

    الله يسعدك يا عمو الدهليز على الموضوع الرائع ..

    بالنسبة لي انا وأهلي بنقضي الشعبنة على السطوح .. والله الجو مررررة حار ..

    ويدوبك نشوي دجاجنا وناكل اكلنا وكل واحد ينزل شقته ويشغل المكيف ..

    والا نكمل السهرة في شقة اخويا الكبير والا بشقة الوالد ..

    واهم شي في تجمع العائلة هذا يكون في طراطيع نطرطعها عشان ندخل اجواء رمضان ونحتفل بقدومه ..

    وربنا يبلغنا ويبلغكم رمضان هذا الشهر الكريم على خير وسلامة ..

    قولو آميــــــــــــــــــــــــــــن .. اللهم امين
     
  7. suzano

    suzano تاجر محترف

    إنضم إلينا في:
    ‏13 ابريل 2010
    المشاركات:
    12,586
    الإعجابات المتلقاة:
    4
    الجنس:
    أنثى
    الوظيفة:
    معلمة
    الإقامة:
    ينبع
    يازين اللمه و الجمعه الحلوة
    الله يسلم لي مكه و اهلها
    و عاداتها
     
  8. تاجرخردة

    تاجرخردة تاجر

    إنضم إلينا في:
    ‏23 نوفمبر 2010
    المشاركات:
    44
    الإعجابات المتلقاة:
    0
    وياخدو معاهم طلي بس يكون حي يسير يشعبن معاهم ويشوف الدنيا قبل ما يتكل على الله :021:

    هههههههههههههههههههههههههههههههههههااااااااااااا

    والله ذبحتني من الضحك لين عيوني دمعت

    قمة الابداع .... واصل يا دهليز واصل

    كلنا شوق لمواضيعك القيمة

     
  9. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته

    الله يصبحكم بالخير جميعا
    ويجعل صباحكم مبارك ان شاء الله

    اشكر كل الحبايب اللي شرفونا ونورونا بكلامهم
    وان شاء الله ارد عليكم واحد واحد بس انتهي من الموضوع

    نجي لتماشي البحر ان كان بحر جدة والا بحر مكة :052: الشعيبة

    نفس الترتيبات الليفوق

    بس ناخد زيادة معانا مناشف وحوايج زيادة وكم جالون موية
    طبعا من تباتيك زمان كنا لمن نروح البحر لاااااااااااااااااااااااازم
    ننزل ونطشطش بالموية ونمشي رجولنا من الصوغار علين الكبار

    يقلك علشان ينفك النحس والعكوسات طبعا كلو بامر الله
    ونجيب جك والا مغراف كبير ونتروش بموية البحر لانه كمان مفيدة
    تشيل الحبوب وتصفي البشرة سبحان الله

    ولمن نغلق نجيب جوالين الموية الحلوة ونتروش بيها علشان تطلع الملوحية
    حقت البحرعلشان جتتنا لاتاكلنا ونفضل نحك ونهرش زي اللي صايبهم جرب البعيد

    والبزورة يجيبو معاهم قدر صغير ويجمعو ابو جلمبو لا ترقد جمبو تشيلو تحطو على يدك رجلك فخضك
    صحيح يجزع بس حلو وساعات يندر ابو جلمبو ويفلت البيت حقو يلملمو البيوت ويلعبو بيها كومكم
    ويبشكو البزورة بالتراب حق البحر ويكشو بعضهم ويسوو بالتراب ابراج وعماير واوقاف زي اللي شايفينها دحين :p5088:


    على الضحوية اللي في راص اهلو عوم وغطس ينزل ينقي سمك طبعا الشغلة هادي أكتر حاجة في الشعبنة مع الاصحاب
    لانو الاهلية صعب ننزل ونفلتهم لحالهم

    والا يزلو على البنقلة ويشترو حوت وابو مقص وروبيان ووزف
    يركبو جمبو قدر ابيض وقدر صيادية
    والوزف يقلوه وبعدين يرشو عليه ملح دقة وشطة تكروني ويتاكل زي الناشف حق البويوم
    والحريم يزبطو الحوت ويبزروه ويقلوه واحلى حوت ياجماعة لمن تاكلوه على البحر من جد طعم اخر حلاااوة

    ولمن نغلق التباسي والقدور مزفرة ايش نسوي
    ننزل على البحر ونجيب من التراب الناعم ونفرك التباسي بيها وتندر الزفرة منها ونغسلها بموية البحر

    قبل لا نمشي وعلبال مايجمعو العفش يروحو على البحر ويتفرجو على الشمس لمن تغيب
    والدنيا حمراااااااااا وخدو من الكلام الحلو
    طبعا البزورة بعيدين والا كان صارت شغلات تبكي

    اي والله ياجماعة تمشية من حقت اول من جد تغسل الهموم والطفش والزهق
    وتريح القلب والباااااااال

    مو زي دحين
    طفشانييييييييييييييييين
    قوم نتمشى
    طيب نقو محل تتمشو فيه
    طفشانيييييييييييييييييين
    كل مرة جدة هدا
    نندر نتمشى برضهم
    طفشانييييييييييييييييين

    مو عارفين ايش يلعبو
    طفشانيييييييييين
    كل مرة كورة واسكمبيل و وضومنة وشرعت

    نجي وقت الطافوحلي برضو كمانة
    طفشانييييييييين
    من الاكل
    بس الله يطفش عيشتكم ناقص كرب الواحد وزهق
    اقعدو على اللي يروح معاكم ويندركم بلا وجع قلب

    وبيني وبينكم دحين مافي مكان نتمشى فيه زي اول
    نبغى نتكلم مع الحبايب عن تماشي دحين
    فين الناس تروح :cnf3: :ang:
    بحر زي حق زمان مافي كلو مصكصك ومقفل
    حتى الكورنيش كللللللللللللو دبابات وفيتون وحمير وجحوش وغير الروايح حقتهم شي يلعب ال قلب الله يكرمكم
    والبيوت حقت البحر والكباين ماتناسبني مرة كلها مصخرة وقلة حيا
    ونحنا مايمشي الكلام هادا عندنا

    علشان كدة هجرنا التماشي والقيلات والسمرات
    طولنا عليكم سامحونا

    وفي اماااان الله
     
  10. التاجرة اليمنية

    التاجرة اليمنية تاجرة حنة يمنية وعسل دوعن

    إنضم إلينا في:
    ‏22 يوليو 2010
    المشاركات:
    7,998
    الإعجابات المتلقاة:
    0
    الإقامة:
    جدة الله يحميها
    ههههههه كلامك درر تبارك الله

    والله موضوعك يا عمو جا في وقتو
    اليووووووووووم موعد الشعبنة حقتنا
    طبعا لهم اسبوع يخططوا وش بيسووا ويجهزوا الاكل ويوزعوا الشغلات على كل وااااااحد فيهم
    طبعا الحريم في البيوت استر لهم هههههه..
    وبصراحة هذي احححححححلى عااااااااادة

    موضوووووع راااااائع جدااااااا ومميز

    وكل عااااااااااام وانتوا بخييييييير
     
  11. شـروق الجمـال

    شـروق الجمـال تاجر محترف

    إنضم إلينا في:
    ‏28 ابريل 2009
    المشاركات:
    4,650
    الإعجابات المتلقاة:
    0
    الإقامة:
    مكــــة المكــــرمـة
    صبحكم الله بالخير
    بالنسبة لموضوع الشعبنة حاسة انو كل سنة بتصغر الدايرة
    يعني كل مالها وتصغر اللمه سبحان الله
    ياخوفي يجي اليوم اللي اشعبن فيه لحالي :(
    زمان كان كل سنة بنسويها في بيت جدي
    وقبل السنة اللي راحت سوينا الشعبنة في مخطط الزايدي بس مو بالظهر ولا كان انسلخنا
    والسنة اللي راحت كانت في الشعيبة بفلل القطان المعمرة وعلى البحر والسمك اخر حلاوة
    والله اعلم فين حتكون دي السنة بس اتمنى انها تتكرر تجربة القطان ليها ذكريات مرة حلوة رغم انها ماصارت من فترة طويلة
    كان نفسي تكون بالشفا بس يقولوا دحين ظل الشجرة صار بـ 100 في الساعة !!
    صحيح دا الكلام ؟
     
  12. أم الخطاب

    أم الخطاب تاجر مميز

    إنضم إلينا في:
    ‏30 أغسطس 2010
    المشاركات:
    365
    الإعجابات المتلقاة:
    1
    هي عادة حلوة بس الدنيا أتغيرت ومو كل واحد أوكل عيلة تقدر عليها .. الآن كل شي صارخفيف وجاهز .. يعني عشا خفيف يجمع الأهل في أي أي مطعم عند التخصصي وما بعده وياالله الخراج .. ألله يجمعنا على خير ويوفق بين المسلمين ويعنيننا جميعا على صيام رمضان وقيامه على الوجه الذي يرضيه ..
     
  13. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته

    صبحكم الله بالخير جميعا في هادا اليوم الفضيل
    الله يتقبل من الجميع ان شاء الله

    كتبنا عن الشعبنة في مكة والبساتين الموجودة فيها او في جدة على البحر او الطايف والهدا
    او الشعيبة هادي اشهر الاماكن اللي الناس متعودة تروح لها

    بالزات عرفة كانت افضل مكان الناس تروح له
    وفي منهم يروح قيلة يعني من الضهرية يزبط له مخيم وما يجي العصر قريب المغرب بالكتير
    الا والناس قيدها قدفت من كل مكان اللهم صلي على النبي
    ويا محلى التمشيات بالقرنبع والكراكب اللي نجيبها من البيت
    يحس الواحد بمتعة في العمل والشغل مع بعض
    كل واحد يساعد ويعاون التاني
    حتى الحريم بين بعضهم كل وحدة تسوي لها شغلة ويتوازعو الشغل فيما بينهم
    والاكل ما يحتاج له اي كلام مع اللمة الحلوة الواحد نفسه تنفتح سبحان الله
    مع انه مافي اكلات جديدة اخترعناها نفس الاكل اللي متعودين عليه
    بس ازا كان الجو حلوة والصحبة حلوة ونفسهم طيبة الواحد ينشرح صدره

    لكن دحين ما نقول غير الله المستعان على هادا الزمان بس

    يالله لانطول عليكم وندي المجال لغيرنا يحكينا عن الشعبنة ان كان في مكة والا جدة واالا المدينة والا الطايف
    اللي حابب يشارك مرحبابه واللي مو حابب يشارك يجلس في بيته للطفش

    وفي امااااان الله
     
  14. بسمةالحياة

    بسمةالحياة تاجر

    إنضم إلينا في:
    ‏16 أغسطس 2010
    المشاركات:
    74
    الإعجابات المتلقاة:
    0
    والله صح كلامك يا دهليز فين شعبنه زمان و فين دحين
    دحين لو قلت شعبنه كل و احد يقول مشغول و لا اشوف يمكن اسافر علي قولة ابويا ما في احد فاضي لحد
    و بالنسبة لشعبنة دحين فين اقلك يا في كباين وكلها اسعارها حريقة عشان اجازه او في منتجع من منتجعات
    الشفا و الهدا زمان احلي عشان كانت خرجه علي الهوا يعني مو من بيت لبيت يعني من بيت لكبينه
     
  15. اللي يشعبن بمكة وقت الحر غلطان

    احنا متعودين كل سنه بالشفاء او الهداء يالله على الجو

    اتخيلو السنه اللي فاتت كنا بالشفاء درجة الحرارة 48 بمكة ورطوبة

    الشفاء 13 درجة الحرارة وامطار ماشاء الله واقسم بالله كنت ببكي من الجو الحلو
    تثلجنا هناك

    وإن شاء الله راح نكررها بإذن الله
     

مشاركة هذه الصفحة