1. مرحبا بكم في أسواق ستي أكبر المواقع التجارية شعبية
    إستبعاد الملاحظة

الزقاق

الكاتب: إستيته فتو, بتاريخ ‏12 مارس 2011.

  1. إستيته فتو

    إستيته فتو تاجر

    إنضم إلينا في:
    ‏7 مارس 2011
    المشاركات:
    13
    الإعجابات المتلقاة:
    0
    احلى وأرق تحية لأحلى أعضاء في احلى منتدى
    هذه قصيدة مكاوية قديمة لها طعم خاص ومكانة في قلبي .
    هذه القصيدة إهداء للجميع وبالذات سيدي دهليز
    الزقااااااااااااااااااااق

    نسمة حلوة جات في بالي:confused:
    يا زقاق بيتنا القديم
    نعنشت بستان خيالي
    بريحة النبك و النيم
    لما كنا صغار و دقة
    و كانت حالتنا طينة
    و نحن نلعب في الأزقة
    و لا أحد يسأل علينا
    هادا قرصتو بقه
    و عمال تهرشلو أمينة
    و هادا في جيبوا بقعة زرقة
    واصلة لحد الفنيلة
    و هادا ماسك أم طقة
    يسئلها نروح المدينة
    و دا ماشي و في توبو قلقه
    و كائنوا كان جالس في كينة
    و دا يلحس حمر في ورقة
    و البحر خلا طحينة
    و دا يلف في مرقة
    و فمه شغال زي الماكينة
    و دا شايل على راسه شقة
    يخبزها لخالة حسينة
    و هادا متشعبط في سقا
    سألوا متى رايح تجينا
    و دا عمال يحنجل على عمره ابن الذين
    قال بيلعبلي بربر تقول في رجلو غرغرينة
    و عيال عمال تزعق
    يا مطرة حطي علينا
    و حرمة من الروشان تبربر
    انكتم عساك القرينة
    و دول في لعبة أودام
    و دول في استوات المقادم
    و دا شبر مات البراطم
    و مسوي شوطة و ازعرينه
    و دول في طبيش الأعمى
    و هادا يجري ورا الكلاب
    و دا في البازار يستحما
    حتى ما تشوف امه الهباب
    و دا يبغى يقلبها ظلمة
    يحرش مين يكش التراب
    و دا مسوي صياح و رجة
    و دا كب دقيق حجة
    و هادا بيسبسب في كنجة
    مع أنه زي الغراب
    و هادا بيلعب برجون
    و هادا جاب بالكورة قول
    و هادا خوف من العيون
    لبسوه أهل حجاب
    و دا ماسكله جنط
    يجرى ورا بحديدة
    و عمال ينقز و ينط
    و شبب و فردة و فريدة
    و دول في طيري طار
    و دول ينطوا فوق أشبار
    و دا راكب فوق جريدة
    قال مسويها حمار:D:D
    و دا بيطقطق أقر
    و هادا بياكول لنقطة
    و هادا بيغمس في شرش
    و الحكاية ملخبطة
    و هادا من قوة بطر يبغى ياكل لغمطة
    و شيبة زورو انشقر
    سيب يا واد الشعبطة
    كنت تشوف الحكاوي
    و اللي يمشوي السقاوي
    ياكل كل يوم علقة
    عشان يطلع شقاوي
    اشتقت يا زقاقنا لجارك
    لكل مين دعسك و زارك
    اشتقت للوزك الهندي
    اتشعبطلو أشجارك
    و هادي نسمة خفيفة
    من حياة حلوة و لطيفة
    صورة من الماضي الكريم
    في زقاق بيتنا القديم
    هذه من كلمات الأستاذ : عبد لله دبلول

    وإلي موعارف بعض المصطلحات يراجع سيدي دهليز
    سبتكم بعافية:052:
    إستيتة فتو
    <HR>
     
  2. -ملامح شرقيه-

    -ملامح شرقيه- تاجر محترف

    إنضم إلينا في:
    ‏21 أكتوبر 2009
    المشاركات:
    1,868
    الإعجابات المتلقاة:
    0
    الوظيفة:
    0535804106
    الإقامة:
    مكه المكرمه
    حكاية مكاويه


    يقلكم يا محافيظ السلامه هادا وااااد يبيع حلاوه طحينيه [​IMG] قدام الدحديره اللي قدام بيتهم المهم صاحبنا هادا كل يوم يتمرقع مع البنيته اللي رايحه واللي جيه [​IMG] حقون الحاره

    المهم مره وهوه يتمجغ مع واحده بنت [​IMG] كانت احلى بنات الحاره ( فتووو) [​IMG] المهم بدأ هوه يتمرقع معاها ويديها كلام من اللي هووه [​IMG] ( يا حلو يا لدو يا لبنيه يا هريسه ) المهم والبنت ما ادتلو وجه


    راح أخينا انقهر وركب راسه الف جني وجني وكل يوم يتمرقع ويتمجغ معاها [​IMG] مافي فايده المهم الولد هادا بياع الطحينيه حب فتوووووو [​IMG][​IMG]

    وتاني يوم وهيه معديه من قدامه إلا يوقف قدامها ويقلها يا فتووو عورتي قلبي بحبك وانا جي اقلك انه نيتي سليمه وابغا أتزوج ,, :[​IMG][​IMG] أيش قلتي ؟؟

    وقفت فتووو وقالتله هو هادا اللي ناقص اتزوج واحد حق حلاوه طبعا يحقلها فتووو ابوها العم سراااج لي شنه ورنه في الحاره كلها [​IMG][​IMG] وكل واحد يضربله الف حساب يقوم يجي واحد سفروت زي هادا يبغى يتزوجها المهم

    المهم الولد هادا انقهر قام فكر في فكره بنت كلب وراح لعم سرااااج بس ما طلب يدها راح وقله ابغا استلف منك فلووس [​IMG][​IMG]وارجعلك هيه بعد شهرين


    المهم ويأخد الفلوس من هنا وفتحله دكان صغير يبيع في لدو ولبنيه وهريسه ومفروكه وكل انواع الحلويات اللي تجيب السكر المهم ويكسب ويفتح كزا محل

    المهم ويرجع لعم سراااج ويردله فلوسه ويقله ابغا اتزوج بنتك طبعا الوااد هادا سار من اكبر تجار الحلويات في البلد قام عم سراااج وافق وقام راح لفتوووو يسألها رايها

    قالت فتووو تبغا تشوفه وبس يا حبيبي عينك ما تشوف إلا النور اول ما شافته قالتله ياواااد يا بكاش بطلك بهلله انتا بياع حلاوه طحينيه سرت تاجر ياهم الزمان قلها اللي سار وقلها الواحد مو بحلاوته الواحد بفتاكته

    قامت ضحكت فتووو ضحكه من تحت لتحت [​IMG][​IMG] ووافقت من كلام الوااااد حقنا وعاشوا في تبات ونبات وخلفوا صبيان وبنات [​IMG][​IMG]: يلاااا عاد قفلوا الكومبيوتر واللمبات وناموا انتهت الحكايه[​IMG][​IMG]:


    عجبتني الحكايه ونقلتها لكم
    سؤال ؟؟ يا استيته فتوووووو
    هوا انتي صاحبة الحكايه
    ولا .........



     
  3. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,635
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    مشكورة ستي فتو على الاهداء الحلو
    اللي زكرنا بمكة القديمة الله يرحمها ويرحم اهلها طيبين والا ميتين

    و
    يعني حالة صعبة وقاسية لكنها مستورة

    القلقة هادي زي البقعة تجي للواحد ازا جلس على مكان فيلو رطوبة او نداوة وبالزات لو على رملة او تراب الله يعزكم


    الشقة هادي المكان اللي ينحط فيها العيش
    كانت زنابيل وفي منها خشب
    اللي يسموها طبلية بس هادي الخشب تكون كبيرة ومستطلية
    زي اللي يرص على العزب الكعك :p5088:
    :021::021::021::021::021:

    والله يافتو ماسك معاك البازار مو راضي يفكك
    حللللللوة الواحد يتروش في البازار قدام امة محمد

    البازان مو البازار مكان الموية ويجي السقا يعبي الزفاف من نفس البازان
    ويوزعها على البيوت والزفة هيا تنكة من الحدي تتعلق في عصاية خشب
    من الجنبين يعني في كل جنب تنكة
    ويجيبها ويفرغها في البيت
    وكللللللللللللللو يهون ولا زعل السقا
    لانه لو زعل السقا تطلع ريحتنا وماعاد نشوف الموية
    ويكتب بوصلة فحم على بيت فتو باقي ريال
    وساعات يجي ويحط صليب على بيت الدهليز
    يعني لو أطمنطر ما اخد موية من السقا
    اللهم ازا انقرنت ومت يجيب موية يغسلني بها :214:

    ودقيق الحجة حاجة مقدسة استغفر الله
    اللي ولد ابوه يكب دقيق الحجة مني داري ليه
    حجات زمان يمكن كانوا ملوك والا على راصهم ريشة
    وازا مسكت الولد تلعن جدفه بالشقلوب وتلغمطه بالدقيق
    وينعرف فلان ادمي كب الدقيق طبعا هادا غير سعيد اللي سف الدقيق :p5088:

    الجريدة يعني جريد النخل او السعف لا يروح بالكم عكاظ

    الأقر هادي حلاوة جاوية قريبة من الماسية
    يحطوها في زبدية بعد ما تجمد ويحطو توت وموية زهر وورد
    ويطقطقوها في الزبادي علشان يفتفتوها ويشربو الموية

    وكانوا يقولو لاتاكل اقر علشان لا تسير جاوا بقر

    اللنقطة اخت اللقيمات
    بس اللنقطة تجي سااادة عجينة وملح وموية تتغمس في زلطة الحومر مع الكوزبرة
    واللقيمات هادي اللي ياكلوها في العيد بالشمر والحبة السودة ويغمسوها في الشيرة

    بس وبقية الكلمات معروفة والا موووو

    راجعلك يا ام فيصل انت وحكاويكي هادي
     
  4. إستيته فتو

    إستيته فتو تاجر

    إنضم إلينا في:
    ‏7 مارس 2011
    المشاركات:
    13
    الإعجابات المتلقاة:
    0
    يافتاح ياعليم يارزاق ياكريم
    صباحكم فل وعنبر
    كيفك ياام فيصل انشاء الله بخير
    هي سلفتي علوية السوسة لحقت
    تقلكم الحكاية اصلن هي ماتتبل في فمها
    الفولة يالطيف:ang:
    يمديها قالتلك الحكاية على بالها تدخل
    السوق زي لكن بعييييد عن؟ البعيدة:021:
    دخيلك يابنتي خلي الهرجة سر بيننا
    وابشري بالدو واللبنية وفوفل كمان
    ولو بغيتي منفوش ابو الحوت كمان
    ماعندي مانع
    ههههههههه
    كيفك سيدي دهليز
    شفت كيف من روحة مرة ايش
    صار فيه ماسك معايا البازار حتى
    في احلامي:(:(
    ودا كان في روز ايش راح يصير
    لو رحت الذكر الخالدة دي
    شكلهم بيودني المرستان دغري:p5088::D
    سلامي للكل والجميع
    إستيته فتو
     
  5. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,635
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    مين الحلواني يا اختي ملامح
    شهاب والا ابو نار

    يمكن القصة صار دي الايام
    لانه زمان ماكان عندنا الكلام هادا وحركات النص الكم
    بنات الحارة وحريمها زي اهالينا وعارفينهم بيت بيت
    وازا البنت او الحرمة تبغى تروح مكان ما تخااف لانه رجال الحارة وشبابها
    زي اخوانها ينتبهوا لها علين ماتوصل للمكان اللي تبغاه

    مو زي دحين لو فكيت لمبة في الغرفة تلاقي الجيران واللي في الشارع
    واقفين يوايقو يقلعقلهم مين اللي في ورا الطاقة

    مشكورة على الحكاية

    والله يعينك يافتو على البازار
    ازا كانت روحة وحدة خلتك تقلبي البازان بازار

    المرة التانية شكلك تبيعي ابزار في البازار
     
  6. وســـــام

    وســـــام تاجر مميز

    إنضم إلينا في:
    ‏19 يوليو 2009
    المشاركات:
    281
    الإعجابات المتلقاة:
    0
    ههههههههههههههههههههههههههههههههههههههههههههههههههههههههههههههههه

    الله يقطع اباليسكم ضحتوني من صباح رب العالمين
    يسعدكم ربي
     
  7. إستيته فتو

    إستيته فتو تاجر

    إنضم إلينا في:
    ‏7 مارس 2011
    المشاركات:
    13
    الإعجابات المتلقاة:
    0
    مساكم الله باخير حبايبي
    انست وشرفت ياحسام ياولدي
    والله يديم عليك الفرح والسرور
    كيفك سيدي دهليز
    صح ان زمان ماكان في الكلام دا
    الين دحين في شباب الحرارة الي
    كلهم شهامة ونخوة شباب يحافظ على
    عار جارو زي عارو
    وانا راي في الي بيصير دحين من
    مغازلات سببها البنت
    تفتكر ياسيدي زمان لمن كانت الحرمة
    تخرج من البيت راسها في الارض
    وكيف تلصق في الجدار ولا تتجرأ تمشي وسط
    الشارع من زود الحشمة والبنات اصلا مايخرجو
    من البيت الا للضرورة وتلاقي رجولها تتخبط في
    بعض من الخوف والكسوف وهي متسترة مايبان اصباعها
    اما بنات اليومين دول لا تعليق
    بس انزل السوق وشوف
    الله يهديهم
    كل البنات يبغو يصيرو نور كل الشباب مهند
    ودحين استاذنكم ولنا رجعة تاني
    سبتكم بعافية
    إستيته فتو
     
  8. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,635
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    اضحكي يا سام ربي يسعدك على طول
    يقلك الضحك يطول العمر والبكا يقصف العمر
    انا ان ما اضحك في اليوم مرررة انفجر اي والله

    والله ياستي فتو
    برضو شباب دحين بعضهم فيلو نخوة ورجولة وشهامة

    وزي ما اتفضلي البلا كلللو من البنت
    دحين البنات مفلوتين ومتصرمحين هنا وهناك والاهل ما على بالهم

    زمان الله اكبر المغرب ان ما خشو البزورة البيت
    تجلس الام عند باب الزقاق وتفقع رقابهم وهم داخلين
    والا تسك الباب يسير لمن يجي الاب بعد صلا ة العشا
    ويلاقيهم متسربين يجدد ايمانهم

    وطبعا زمان حتى الام يا من الروشان والا من باب الزقاق ماتزهم بصوتها على البزورة
    تصفق لهم وكل ولد او بنت تعرف صفقة امها وتطلع للبيت
    طبعا التصفيق بادب وبشويش
    مو تصفق كأنها في فرقة ينبعاوي
    لانه صوت الحرمة عورة وعلشان لا يسمعوها الرجال مو زي دحين
    هرج وتسطيح وضحك في وسط الناس

    علشان كدة البنات ملزومين من اهاليهم
    فين يا اب او يا ام بالتحديد تشوفي بناتك فين رايحين ومع مين وايش لابسين
    اما نفلت لهم الجمل بما حمل مايصلح الكلام هادا

    وازا جيتي تتكلمي يا فتو
    يقلك جيلكم غير جيلنا

    البنت لو بدها تندر مناسبة وشافها ابوها حاطة حومرة وبودرة
    يلطشها قلم يلوح خلقتها
    انتي رايحة تزوري الناس والا نادرة تدوري على جوز
    هيا هادي حرمة وبودرة

    ايش اقول زي ما اسمع من الاهل البنات دحين بيسوو شغلات في الكوفيرات
    مايسوها الا المتزوجات
    يالطييييييييييييف بس الله يستر على ولايانا وولاياكم

    وعلى سيرة الحريم اللي يمشو في الزقاق
    اول ازا الحرمة عدت ومشيت كل الرجال والشباب يرخو راصهم في الارض
    او يديرو ضهرهم للحرمة حتى تمشي
    ولو الحرمة نازلة في درج يوقف الرجال برا البيت حتى تندر وهو يدخل
     
  9. إستيته فتو

    إستيته فتو تاجر

    إنضم إلينا في:
    ‏7 مارس 2011
    المشاركات:
    13
    الإعجابات المتلقاة:
    0
    :clapinghand:أهل البازار فينكم ياهو
    وصلنا للقاعة ودخلناها
    شفت امة لااله الا الله وماشفت
    الغالية ام فيصل ياهو ياجماعة
    فين ملامح شرقية انا جيت اليوم
    علشانها وجايبة معايا لدو ولبنية
    الي تقلي ماتعرفها والي تقول صاحبة
    البازار راحت من بدري لكن اسمها؟
    مو ام فيصل:214:
    والي تقول اصلا ماجات اليوم
    واخيرا دلوني على وحدة وشها سمح
    اسمها ام علي الله يكرمها ويحفظلها
    ابو حسن واخوانو:D
    قصر الكلام قالتلي اعرفها لكن ماشفتها اليوم
    طيب لو ماعليك كلفة يابنتي:cnf3:
    ممكن توصليلها دا الزنبيل وتبلغيها سلااااامي
    وتكتك تكتك زي مارحتي جيتي يا فتو
     
  10. -ملامح شرقيه-

    -ملامح شرقيه- تاجر محترف

    إنضم إلينا في:
    ‏21 أكتوبر 2009
    المشاركات:
    1,868
    الإعجابات المتلقاة:
    0
    الوظيفة:
    0535804106
    الإقامة:
    مكه المكرمه
    السلام عليكم ورحمة الله وبركاته
    انستكم الرحمة
    والله يجعلها امطار خير وبركه ويعم نفعها ارجاء البلاد
    اهوه احنا هنا بس شويت مشاغل شغلتنا شوي
    الله لا يشغلنا الا في طاعته
    نورة القاعه بنورك يا غاليه
    انا في البازار مشاركة متعاونه
    جبتلهم كذا تاجره يوم السبت ورتبوا اغراضهم ومشينا
    ويوم الاحد الافتتاح حصلي ظرف وما قدرت اجي
    وجيت البازار يوم الاثنين والثلاثاء
    وفعلاً كانت امة محمد مجتمعه فيه وكان جداً رائع
    طبعاً في فرق بينه وبين بازار روز
    ومشكوره ياقلبي على الهديه
    الله يعطيك العافيه كلفتي على نفسك
    بس بصراحه لدو ولبنيه على كيف كيفك
    اول ماوصلت عند ام علي الغاليه قالتلي
    استلمي هديتك وحده بنت حلال سألت عنك
    ولمن ما حصلتك اعطتني هيه وقالتلي هاذي امانه وسلميها
    :p5088: ام فيصل :p5088:
    لازم ذحين ارجعلك الهديه ايش نفسك فيه وفين الاقيكي
    يالله نتقابل في معرض تراثيات بأذن الله
    شفتي كيف سلفتك علويه حكتني الحكايه
    بس انا طلعت فتكه وما قلتلها على اسواق ستي
    ارسلتها منتدى ثاني وشكلها حايسه تدور عليكي من منتدى لمنتدى
    واذا ما ارسلتيلي منفوش ابو الحوت راح اكلمها على اسواق ستي
    خذي الحذر قد اعذر من انذر

    هههههههههههه هههههههههههه هههههههههههههه

    قوايا حريم ...... ;)
     
  11. -رشة عطر-

    -رشة عطر- تاجر محترف

    إنضم إلينا في:
    ‏1 ابريل 2010
    المشاركات:
    2,210
    الإعجابات المتلقاة:
    0
    حكاوي مكاوية مية في المية

    صكة بلوت

    المنظر : بيت من بيوت مكة يتكون من عدة طوابق الطابق الأخير هناك الخارجة والصفة والقطيع

    - يا عبده ..... يا ولد يا عبده ......... يا عبدو

    - مرحبا عمي

    - فينك عساك البلا . من أولية وأنا أزهم عليك .. إلين أتنبح صوتي.

    - عمتي ارسلتني إلى الدكان..

    - أمشي بلا عمتي ....... بلا عمتي .... عمامة قمل إن شاالله . تعال هنا .

    - حاضر ياعمي.

    - شوف أبغاك بعد صلاة العصر تروح هوا على عمك إبراهيم وتقولوا عمي يبغى منك المروحة القعّادي . وتاخدها منو وتجيبها هنا و تطلعها في الخارجة. بعدين ترش الخارجة بالمويه وبعدين تجيب الشربتين إللي في المركب وتحطها في المشربية وتفرش الخارجة وتجيب أنت وزبيدة المساند والتكايات من الخزين فوق في السطوح وتظبطو الخارجة عشان جايين البشكة الليلة يسهروا عندي. وبعد المغرب تروح لدكان عمك طاهر وتجيب من عنده ليات الشيش إللي وديتها أمس لعنده عشان يصيخها... فاكر ولا نسيت.

    - فاكر يا عمي .... هما البشكة جايين الليلة يا عمي.

    - إيوه ... عساك الصنج.,أنا أقولك سوي الحاجات هادي ليه... أوه لا تنسى تحط بنت المنقلة جنب باب الطهارة وتولع الفحم في وش العدو بعد صلاة العشا وتقول لعمتك تعبي براريد الشاهي و الفناجيل. يا الله قوم بسرعة.

    - حاضر يا عمي.

    بعد صلاة العشاء وصل البعض من البشكة.

    - سلام عليكم

    - عليكم السلام و رحمة الله و بركاته

    - هلأ ... هلأ ....بي وَش الفلى.. من غاب الغيبة جاب الغنائم .... فين الناس من زمان ؟

    - أهو ... في هادي الدنيا .. فاضي مشغول. زي أم العروسة.

    - ول .... ول .... إشبك كِده مهموم. خلليها علله ياراجل .. لا تفكر ... لها مدبر.

    - يلله ياهو ناخد صكة بلوت قبل ما تكتر البشكة... و ما راح يوصلنا السرا.

    - يلله . مين يقابلني .. لا ما أبغى حسين يقابلني ... هادا غشيييم.

    - قوم يا واد إنت الغشيم. دحين أوريك مين الغشيم ؟ .. قابلني يا محمد ... خلينا نوريه مين الغشيم.

    - حُكُم .

    - لا صن ..... ميِّة

    - لا ما فينا رص .... الغشيم هو اللي يرص.

    - لا أنا بس أخشخشها ... ما أرص .

    و يصل بقية البشكة ... ويوصل آخر واحد.

    - سلام عليكم

    - وعليكم السلام ورحمة الله وبركاته ... فينك ... ليش أتأخرت.

    - أسكت يا شيخ الحريم دول شغلتهم شغلة على بال ما يجو من المقينة ويلبسو الكورَت ويحطوا الحمرة والبودرة وعلى بال ما يتلكعوا شوية أقوم أوديهم ُجَواز بيت عم صابر .. أصله الليلة صبحة ولده سامي .... و الحرمة نصييصة مع أهل العريس.

    - والله كنا رايحين نتعشى ونسيبك .

    - يالله معليش أخرتكم شوية .... أقولك هادا مو عم حمزة إللي جنب الرادو ؟

    - إلا هو ... شوفوا رايح مع حفلة السيدة.

    - أهلاً عم حمزة ... سلام عليكم .

    - عليكم السلام ... هلا ..... هلا ....كيف حالك.

    - نعمه ... الحمد لله .... كده آخد الجو لوحدك .... ورايح فيها .

    - لم الزمان اللي غدربي بعدك و كنت نديم شكواه

    رماك و جا السهم في قلبي عطف عليه والبعد ضناه

    - الله ياعم حمزة ... أتريك .... غاطس غطسة بنت كلب ..

    - يا واد .... أبعد عني خليني أسبح في بحر الغرام لوحدي.

    - الله ..... الله ... هادا واقع بدبابيبو . .... ها ما جا دوري.... يالله المغلوب يجنب على جنب.

    - يالله يا هو العشا فاصل.

    - العشا فاصل !! هادي غشامة..... الله فكك من غلب يا غشيم.

    - نشوف بعد العشا .... لحسن أنا جعت من كثر الشيش والشاهي.

    - تموا يا جماعة ... و استروا ما وجهتوا ...

    - ما حصل قصور ... كفيت و وفيت ... ما شا الله تبارك الله

    - الله .... سليق ممتاز .... تسلم يدك يا أم صالح .... الله يطرح البركة فيك يا أبو صالح.... هنيالك بأم صالح.

    - بالهنا والعافية... وحياكم الله .وبارك الله فيك.

    - الحمد لله ... نعمة ... والله الواحد أكل بدون حساب .. إلين أنبشم.......... يعطيك الخير يابو صالح.

    - ألف هنا ..... وعافية.

    - يا واد عبده صب الشاهي.

    - حاضر يا عمي.

    - أديني شاهي اخضر خليني أهضم.

    - بالله إذا فيه شاهي بالنعناع بس بدون سكر.

    - حاضر ..... أتفضل .... أتفضل .

    - فين الطهارة.

    - قوم يا واد يا عبده وريه عمك فين الطهارة . و شوف الحنفية فيلها موية كافية والا لأ ؟.

    - يالله يا جماعة أنا أستأزن خلاص الساعة صارت إطنعشر .... هود الليل .... يالله مع السلامة.

    - مو بدري ياهو .

    - لا خلاص سهرنا كتير وبكرة جمعة ... الواحد لازم يصحى بدري عشان ينزل الحرم بدري و يصلي الجمعة ويحَصِّلوا مكان في الصحن. تصبحوا على خير.

    - وانت من أهلو.

    - مع السلامة .... و في حفظ الله.
    _____________________________________

    هرجة الضحوية .. ( تلبيبة الضحوية )


    الضحوية هي الفترة بين الصبح وآذان الظهر

    - قوم يا هو وشوفلي الواد عبده مقصوف الرقبة فينو.

    - يا بهية أنا اتأخرت عن شغلي سيبيني أروح ألحق الشُغل.

    - يعني أنا مؤخيرتك عن الشُغل. مو إنت ما قمت بدري اليوم كنت سهران مع أصحابك وما دريييت عن الوقت

    - يا شيخة سيبك من اسطوانة كل يوم يالله مع السلامة ...........يا عبده ....... يا عبده

    - نعم يا عمي

    - شوف عمتك أيش تبغى. بتدور عليك من الصبح

    -حاضر ياعمي

    - مرحبا عمتي

    - ناموسية كحلي يا مقصوف الرقبة, إلين دحين الساعة سبعة وانتا نايملي. يُهدك يا بعيد ... يالله .. ياالله قوم أتصحصح عشان بدي أرسلك.

    - حاضر عمتي

    - هيا شوف خُد الفلوس هادي و روح لدكان عم محمود واشتري منه بعشرة قروش جبنة بيضة, وبتمنية قروش حلاوة طحينية وزيها كمان حلاوة مفروكة, وجِبلي أربعة أقراص عيش سُحيّرة جديدة من الفُرن... أنتبه يا واد لا يغشوك ويعطوك عيش بايت. سمعت ولا لا ؟

    - سمعت يا عمة. يالله أنا ماشي.

    - أصبر يا واد .. مشيت بطنك. أنا ما غلقت كلامي. شوف بعد ما تاخد الحاجات هادي من الدكان تمر على عم صابر وتقوللو يجبلنا زفتين موية بعد الضُهًر. لحسن الموية إللي عندنا يا دوب تكفي لبعد العصر. مفهوم والا لا؟

    - مفهوم عمتي مفهوم.

    - يا بنت يا زبيدة .. زبيدة .. فينيك إنتي التانية ... الساعة قرربت عشرة وأنا ما روحت لخديجة ... ياالله بسرعة عبي الحاجات إللي جابها عبده و حطيها في الزنبيل . و شوفيلي فين قنعتي و طرحتي لحسن العيال طيرولي دماغي اليوم علين ما راحوا المدرسة.

    - حاضر يا عمة.

    في بيت خديجة

    - سلام عليكم.

    - وعليكم السلام ورحمة الله وبركاته ..... ناموسية كحلي يا بهية ... عسى المانع خير ... ليه أتأخرتي.

    - يوووه يا خديجة . اليوم سارتلي حكاية ... بس خليني أندِر الحاجات إللي جبتها و آخدلي لقمة لحسن من الصبح ما حطيت شي في فمي .

    - وأنا كمان أشوف حليمة سوت الشاهي ولا لأ ؟ حليمة .... حليمة ... تعالي عندي.

    - يا ستي البارح جوزي جولو أصحابه من بعد صلاة العيشة وهات يا بلوت وكونكان ... و يا زبيدة سوي شاهي . يا عبده ولع الفحم وسوي الشيشة. علين ضهورهم تعبت من الطلبات .. لا وسهروا لحد الساعة إحدعشر.. طبعاً جوزي مع السهر قام في الصبح متأخر ... ومين فيه غير بهية ... أصحي البزورة, قووم يا واد أصحي يابنت. واسويلهم الفطور وأعلم عُقوص لمريم وما تبغى الفيونكه الحمراء تبغى الفيونكه البيضة. عشان أيش يا حبة عيني تقول زميلاتها شافوها كتييير بالفيونكه الحمراء. ومحمد آه منه يبغى تواليته و ما يغى يلبس كوفية. يقول ياأمي اليوم حر وكل أصحابي كاشفين روسهم أمس وأول تمس. و على بال ما اظبطله التوليته أخذت مدة مع شعره الخشن.

    - يا شيخة الله يهديهم وينجحهم و يطلعوا متعلمين يفيدوا نفسهم.

    - يوووه .. مع الهرجة نسيت أسال فين ميمونة و إستيته معتوقة ما جوه لحد دحين.

    - يا ستي ... ميمونة أعتزرت اليوم وتقول عندها غسيل كتييير . و جوزها مسافر جدة بعد الضُهر ويا دوب تلحق تسوي حاجات البيت.

    و إستيتة معتوقة تقول جايينها ستات كبار يتلببوا عندها وعندهم هرج كبار ما نصلحلهم.

    - طيب لو قالتلنا ولو بالكِدِب تعالوا شاركونا تلبيبة الصبح ..... يوووه يا لطيف على هادي الحًرمة .. لمن يجوها ستات ما تقولنا ولمن ما عندها أحد تِدوِر علينا .....

    - وي! يقطعني البنت حليمة سوت الشاهي و جابتو هنا من زمان ولا أتكلمت. أكيد بِرد الشاهي

    - أكيد سار زي العصير.

    - إيوالله هادا عصير مو شاهي........ حليمة ........ حليمة... تعالي يا بنت ... الله يهديكي ما تقوليلي إنك جبتي الشاهي ..... هيا شوفي سار زي العصير ..... خودي البراد وحميه شوية .... والا أقوليك ..لأ.. كٌبي هدا الشاهي. وسويلنا شاهي جديد منعنش. خلينا نروق بالنا شوية.

    - تعرفي يا خديجة !! أنا طفشت .. والعطلة جاية قريب ... أقول لجوزي أيش رأيك نروح هادي السنة لمصر أنا طفشت من الطايف..... كل سنة الطايف .... الطايف..

    يجي يقوللي يوووه يا مره مصر مرة وحدة ... هادي يبغالها فلوس كتييييير . فلوس لتذاكر الطيارة وفلوس للسكن في القاهرة وفلوس للتمشية .... من فين أجيب كل هادي الفلوس.

    قمت قولتلوا ... طيب أيش مِعنى بيت جيراننا أبو يوسف راحوا العام مصر ؟

    يقوم يقوللي يعني ما تعرفي ...... أبو يوسف ما شاالله موسع عليهم ربنا ولمَّلوا شويت قرشين صرفها ديك السنة كلها في القاهرة ...... تعريفي كم كلفته هديك السفرة ...... بيقول تقريباً خمسطعشر ألف ريال.

    - ول .. ول ... ول .... خمسطعشر ألف ريال ؟ هادا جوزي يبغالو يشتغل أكتر من سبعة سنوات ليل ونهار عشان يجيب نص هادي الفلوس.

    - يالله خلينا على قدنا نروح الطايف ! ..... ما أدري إنتو ناوين تروحوا الطايف هادي السنة ؟ يا خديجة ؟

    - والله علمي علمك ... جوزي كتوووم ... و ما تدري أيش ناوي ... ولا تقدري تهرجيه هادي الأيام ..... لأنوا مشغول كتيييير بشغلة البيت هادي ..... بيسويلنا فوللة جديدة نسكن فيها.

    - فوللة ....... يا شيخة إسمها فيللا .... أما إنيك جاهلة !!

    - والله يا ستي فوللة فيللا كولها زي بعض.

    - و هادي الفيللا فين ما شالله ؟

    - والله ما أدري يقول في حارة جديدة حلوة بعيدة عن البلد شوية .... لاكن هادئة.

    - بااااااا ألله تسيبوا الحرم ! وتروحوا تسكنوا بعيد بعد كل هادي السنين ...... لا .... لا .... يا شيخة قوليلوا بلاشي من هادي الفيللا . هادي بعيدة .. و رايحة تبعدي عن حبايبك و خِلّانيك. بعدين رايحه تهرجي معا مين ؟ و هرجت الصبحية تهرجيها مع مين..... لا ..... لا أنا مو معاكي في هادي الشغلة.

    - والله جوزي مصمم وحط دم قلبوا على هادي الفيللا. و ربنا يعدلها من عنده.

    - يالله .. أنا أستأزن ! خلاص الساعة صارت إحدعشر ونص ... شوية يأدن الضُهر ويجي جوزي ويدور على الغدا. يالله مع السلامة.

    - أهلاً وسهلاً على بيتنا نور .... سلمي على البزورة . وعلى خالة فاطمة .... إلا هي أيش أخبارها.

    - طيبة ... ماشية في هادي الدنيا .. أمس رُحنالها بعد العصر أنا و بنتي الكبيرة, وجلسنا عندها إلين قبل المغرب بشوية. و سوتلنا الكربو وحطتلنا فضلت خيرك شوية شوربة كانت عملاها في الغدا ... و بعدين جابتلنا فصفص مررررة طعم. بأقوللها يا أمي من فين جيبتي الفصفص هادا ؟ .... ما هي راضية تقوللي من فين ؟ إلا إنتي قوليلي من فين تجيبي الحلاوة الهريسة.

    - واه يا بهية !! يعني ما تعرفي من فين ؟.... كل الناس يجيبوا الحلاوة الهريسة من عند أبو نار والا النوَري ... هما الإتنين إللي يبيعوا الحلاوة الهريسة الممتازة.

    - لا أفتكرت من محل تاني !! يووووه الساعة صارت إطنعشر إلا ربع ونحنا واقفين عند الباب لنا أكتر من ربع ساعة يالله .. دايمن ما تجي الهرجة إلا على الباب .... يالله مع السلامة.

    - مع السلامة .........​
     
  12. اوان الورد

    اوان الورد تاجر

    إنضم إلينا في:
    ‏21 نوفمبر 2010
    المشاركات:
    68
    الإعجابات المتلقاة:
    0
    مساكم الله بالخير
    تشكري يالغلا على القصة
    قصة حلوة ذكرتني بايام الطفولة
    الله يسعدكم ويديم عليكم نعمة
    الصحة
     
  13. إستيته فتو

    إستيته فتو تاجر

    إنضم إلينا في:
    ‏7 مارس 2011
    المشاركات:
    13
    الإعجابات المتلقاة:
    0
    مساكم الله بالستر
    وجمعة مباركة على الجميع
    انستنا الرحمه:p5088:
    قبل لاياخدني الكلاااام وانسى

    عزمتيني يابنتي وماقلتيلي فين

    دا المعرض ومتى ولا عزيمة

    مراكبية ياستي :ang:
    هههههههههههه

    على فكرة كيفك سيدي

    دهليز انستنا الرحمة

    بخصوص ورق الفضة

    موجود عند بعض العطارين

    قلت لولدي ابو عرب يجبلي

    منو بس كيف يوصلك ياسيدي

    ايش رأيك احطو عند العمدة؟؟؟؟؟؟

    وي ياندامة نسيت اشكر

    بنتي ام علي الي وصلت الامانة

    اذا ربنا كتبلي عمر وشفتك تاني:cnf3:

    راح اشتري منك اللمبة الحمرا

    مرررررة عجبتني:D:D

    سبتكم بعافية:052:
    إستيتة فتو
     
  14. شكولاته جذابه

    شكولاته جذابه تاجر محترف

    إنضم إلينا في:
    ‏17 مارس 2011
    المشاركات:
    1,485
    الإعجابات المتلقاة:
    0
    الله يعطيك العافيه يااستيته فتو مواضيعيك ماشاء الله كلها حلوه وشيقه
    حابه ادعوك لبازار قاعة البروج بصفتي تاجره مشتركه بالبازار
    لصاحبته هديل دغريري يوم 29/5 و1-2-3 /6/1432هـ
    ماشاء الله انجح بازار بمكه بصراحه انا رحت وعجبتني الفعاليات والفقرات والجوائز
    وفوق هذا كله اخلاق استاذه هديل ربي يوفقها ويسعدها يارب انسانه في غاية الروعه
    عموما ياعسل لايفوتك البازار بنسوي الجنان فقرات الحفل مفاجاه يوميا مطربه وسحوبات
    على اجهزه كهربائيه اذا حابه تستفسري هذا الرقم : 0557530669
     
  15. _مذهلة_

    _مذهلة_ تاجر مميز

    إنضم إلينا في:
    ‏10 فبراير 2010
    المشاركات:
    879
    الإعجابات المتلقاة:
    0
    ههههههههههههههه الله يسعدكم ونستونا بمواضيعكم الحلوه
     

مشاركة هذه الصفحة