1. مرحبا بكم في أسواق ستي أكبر المواقع التجارية شعبية
    إستبعاد الملاحظة

صندقة مرتبة ولا قصر مكركب

الكاتب: الدهليز, بتاريخ ‏3 مارس 2011.

  1. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    بسم الله الرحمن الرحيم
    اللهم صلي وسلم وبارك على سيدنا وحبيبنا محمد وعلى أله وصحبه وسلم

    السلام عليكم ورحمة لله وبركاته
    صبحكم الله بالخير حبايب قلبي [​IMG]
    إن شاء الله تكونوا بصحة وسلامة واتحمدو الله على كل حال

    طيب خلونا نورور شوية عن موضوع مهم حبتين وهو عن الديكور



    ( صندقة مرتبة ولا قصر مكركب )

    وهادا ياحبايب مسل قدييييم
    معناه انو لو عندك بيت صغير وزي الحوق حق الصلصل لكنو مرتب ومنظم وديكورو حلو
    أحسن من قصر كبير مكركب ومافيه لاديكور ولا لمسة حلوة تشرح الصدر وحتى الألوان حقتو زي تلاوين البزورة

    واحد كان بيحكي راح يدور بيت يستكريه من ناس قلعقلو روح خد نظرة على البيت قبل لا تعربن وتتفصندقةق
    مع انو راعي البيت يحلف انو كبير وحلو وشرح وووو
    المهم على قولة الأدمي كل غرفة في البيت مضروبة بوية شكل وحتى الألوان مهي راكبة على بعض
    وغرفة القعدة محل التلفزيون مسوي الجدروة كم لون

    المهم ندر وشال الحرمة وراحو يدورو على شقة تانية
    على قولو الشقة الأولانية حلوة وواسعة وتفصيلها طيب
    لكن الألوان مهي راكبة على بعض والمصيبة طالب في الشقة 15 ألف ريال ويبغالها تجديد بويات وديكور
    وهيلمان طويل عريض
    راح برم ودور ولاقى شقة ب9ونص لكن ديكورها مرة حلو ومرتبة والله يجعلها قدم خير عليه إن شاء الله

    المهم ديكور البيت ليش بعض الناس ماتهتم بيه بصراحة ؟؟

    طيب مو هادا بيت للسكن والراحة المفروض الواحد يخليه جنة حتى نفسيتو ترتاح وتنشرح
    ليش الناس حتى لو ماشاء الله عندهم فلوس يقصرو على البيت أو الديكور زي خلقتهم
    مسلا الجدران لونها مختلف والبساط لونه مختلف والكنب والا الباطرمة كمانة لونه مختلف
    وصار البيت زي الشيكوليتة ( قصدي عدم تناسق الالوان )

    طبعا الحريم يرمو بلاهم على الرجال والرجال يقولوا الحريم اللي نقو الفرش واللون
    وكل مين يرمي على التاني :ang::ang::ang::ang:

    سمعنا انو في ناس متخصصة في الديكور
    يعني تزهم عليهم بالتلفون وتدخلهم في البيت وهم يفرشو البيت من إلى
    ومالك إلا ولد صالح .....
    أيش رايكم حلوة الطريقة هادي ازا كانت موجودة ...

    وترى ياجماعة الخير الغالي ثمنه فيه مقولة حلوة لكن مو شرط تنطبق على كل شي

    مسلا بيوت زمان على قد ماكانت صغيرة ويااااالله تلم كوم اللحم جوتها لكنها حلوة ومزبرقة ومنقرشة بالرواشين حقتهم والترخيم والنقش القديم
    حتى الليانات اللي كانت بدل الكنب والباطرمة كانوا الستات يسولها كرانيش ودندشة
    ويسير منظرها بالمرة حلو
    وشوية شوية صارو يسوو الكرويت الخشب في الديوان محل غرفة المجلس والصالون دحين
    وكانت تتلبس بالشرك الأبيض ويشتغلوه بالكولف والدندشة

    ولكن دحين الدنيا اتقدمت والبيوت كبرت وأشياء جديدة فنت علينا وغااالية لكن مهي حلوة
    أو زوق الناس مهو حلو مع انو لو جيت أتكلمت يقلك المجلس كلفني 10 الاف ريال والبساط المتر ب80 ريال
    والبويا أصلي الجالون ب200 ريال وزي دي الايام تعتيق وجبس وهباب
    طيب الغلاااا هادا كلو والبيت قايم قاعد يخبط يرقع
    ولمن تسمع الأسعار هادي والله تستكترها على اللي انت شايفو

    ويا محلا صحن الفول المبخر وعليه السمن البلدي وقليل ليمون وبصل قدام المندي

    لا تستغربو

    الرز فيلو عضة
    وصماااااااد يعني بدون ملح
    والرز بااارد ومتستس
    هادا ان ماكانت فيه ريحة لدعة[​IMG]

    وتجي تخير الناس يقلك لا المندي أفخم من الفول مع انو بالمواصفات اللي قلناها
    صحن الفول أقدح مية مرة مايبغالها كلاااااام


    ** هل تفريش البيت تهتمو بالسعر أول والا بالنوع والشكل ؟

    ** لو في حاجة رخيصة عجبتكم رايحين تشتروها والا تسوو زي ناس مايهمهم الا السعر والفخفخة حتى لوكانت مبهوقة وشكلها مايتناسب مع سعرها ؟
    وفي ناس تشتري العازة بريال وتقول ب10 يعني كدب عيني عينك

    ** مين اللي المفروض يفرش البيت الرجال والا الحرمة والا النفرين سوااا ( مع انو التحطيم والعلت لاااازم منها وكل مين يرمي على التاني ) ؟ وبالزات العرسان
    لانه بتسير مشاكل ساعات بين العريس واهل الحرمة
    وتبغى تفرش على كيفها وتختار من الغالي والجخ وتفقع ضهر الولد وتزيد عليه مصاريف :214:

    ** هل انتو راضين على فرش بيتكم بغض النضر إن كان قديم أو جديد قصدي من حيث التناسق ؟

    ** هل لو في ناس مختصة بالديكور والتفريش تزهموهم والا تسوو شغلكم على زوقكم حتى لو كان أي كلام ؟

    ** هل لازم تغيرو الفرش كل سنة والا تمشو بيه لو فيه نفس والا انتو من جماعة خلاااااص الناس شافوه




    وفي حاجة مهمة صحيح الألوان الفاتحة حلوة للعرسان بس ( هادا رأي يمكن صح ويمكن غلط )
    لكن متى ما أتملى البيت بزورة رايحين يوصخوه ويعدموه وساعتها لاااااااازم نرجع للألوان الغاااااااااااااااامقة
    صحيح البيت يسير كتم بس بلا عن بلا أرحم


    والا موووووووووو

    اقرو وفكرو ومخمخو وبعدين ردو جواااااااب
    واكيد هنا في اسوق في ناس محتصة بالديكور
    ومرت عليهم تجارب وقصص
    وبالكرة نشوف راي الاخوان
    والاخوات
    ونشوف مين ذوقه احلى الرجال والا الحرمة :ang:


    يالله لاتنسونا من دعواتكم
    واشكر كل الاعضاء والعضوات اللي سألوا عني الفترة اللي راحت
    والله لايحرمنا منهم
    أودعناكم الرحمن
     
  2. -رشة عطر-

    -رشة عطر- تاجر محترف

    إنضم إلينا في:
    ‏1 ابريل 2010
    المشاركات:
    2,210
    الإعجابات المتلقاة:
    0
    وعليكم السلام ورحمة الله وبركاته
    وصبحكم الله بالخير والرضا والسرور
    وتسلم على الموضوع الرائع والطرح الاروع
    الله يعطيك الصحه والعافيه
    اكيد البيت هو ملجاء وراحة العائله
    ولازم نختار البويات والفرش عن ذوق وتناسق في الالوان
    بس مو مهم يكون غالي المهم الجوده تسويلك شغل ذو جوده
    عشان يعيش معاك كم سنه ومو شرط كل سنه الواحد يغير الفرش
    الرك على النظافه والعنايه المستمره
    وفرش البيت والبويات من اختيار الزوج وزوجته بس 80% لزوجه
    اما مكاتب الديكور حلوه وتساعد على تنظيم البيت اكثر بس الواحد يطلبهم من باب زايد
    والالوان الفاتحه حلوه للبيوت الصغيره تعطيها كبر وتبان كانها وسيعه
    اما الالوان الغامقه تعطيك احساس بالدفئ وحلو لو نخلط الالوان ونمزجها بين الفاتح والغامق
    واهم حاجه الواحد يعمل لبيت الاخره من اعمال صالحه وصلوات وصدقات هاذا هو البيت الدائم
    والله لا يحرمنا ولا يحرمكم الجنه ونعيمها ....
    ودمتم في حفظ الله

     
  3. شكليطة

    شكليطة تاجر مميز

    إنضم إلينا في:
    ‏2 أغسطس 2010
    المشاركات:
    243
    الإعجابات المتلقاة:
    0
    السلام عليكم ورحمة الله وبركاته عمو دهليز عاش من شافك عساك على القوه ---اتفق معك في الراي ان البيت المرتب والانيق بذوق اصحابه مهما كان صغيرفهو الافضل
    وحكاية التغيير ترجع لميزانية الأسرة وحبها للتغيير مع اني مع انتقاء الجيد مهما كان ثمنه:clapinghand: موضوعك جميل وطرحك للفكرة ممتاز :clapinghand:

    بس عندي عتب عليك عمو دهليز اشبها الشكوليطة:mad: لمن قلت

    وصار البيت زي الشيكوليتة ( قصدي عدم تناسق الالوان ) :cnf3: بالعكس الشكوليطة لونها جميل فيه تدرجات رائعه:D
    فمان الله في اطروحات اخرى مفيدة عمو دهليز :052:
     
  4. بيلســــان

    بيلســــان تاجر مميز

    إنضم إلينا في:
    ‏9 أكتوبر 2010
    المشاركات:
    441
    الإعجابات المتلقاة:
    0
    كلامك عين الصواب يا دهليز

    والمشاكل بتزيد مع احتكار الاجانب للسلع الأساسية وصاروا يلعبوا لعب بجيوب السعوديين ومصدقين ان كل سعودي في بيته في بزبوز نفط ..
    يجيك الهندي و لا البنغالي ولا المصري ولا اليماني يكلمك بطريقو إذا عاجبك عاجبك ولا يالله وريني عرض قفاك ..
    مرة جبت عامل يسوي لي بوية وبنتفاصل في السعر .. تخيل يقول لي انتي سعودية المفروض ماتناقشي في السعر ..وبعد ماخلص الشغل زعل اني طلبت منه تعديلات لأنه ماكان مصنفر المعجون زي الأوادم ..
    وطبعا الأتراك محتكرين عالم الأثاث ومضبطين الأمور مع بعضهم خصوصا في المحلات المتجاورة .. واحدة جارتنا تركية اشترت طقم نفس اللي اشترته واحده من صاحباتي ونفس النقشه و القماش بسعر أقل ب 50 ريال للمتر ..

    طبعا الغلا مو عذر عشان نشتري أثاث أي كلام أو نضرب بوية مشي حالك .. لكن الناس انغرت بالتفاصيل زي الجبس وكترة الألوان ونسيوا إنه الشغلة شغلة ذوق وراحة نفس .. وكل ماكان الديكور ناااعم والألوان متناسقة والأثاث قليل كل ماكان البيت مرتب وتلاقي فيه مساحات تشرح الخاطر .
    ونفسي الحريم يبطلوا عادة حط الزوايد فوق الدواليب وتحت السرر ..

    وطبعا قبل كل ده النظااااافة .. تنظيف الغبار أول بأول .. وياريت يهتموا بمسح بيبان الشقق من برة زي مايهتموا ببيوتهم من جوة .. إحنا كان عندنا شقة كنا نأجرها قبل زواج أخويا .. وسبحان الله لمن كان يسكن فيها سوري و لا تركي تلاقي الشقة ريحتها رائعة و نظيفة من برة وجوة .. ولمن استأجرها مرة واحد سعودي وزوجته الباب كان أعزك الله تقرف تمسك قبضة اليد وتركوها الله يسامحهم مستعمرة صراصير بعد محاكم ووجع راس وخسرنا فيها دبل الإيجار اللي دفعه بسبب انسداد السباكة أعزكم الله و المويات اللي غيرت لون سيراميك أرضيات المطبخ و الحمامات لانهم ماكانوا ينشفوها ..

    المشكلة محتاجه إنه الواحد لمن يبغى يغير ديكور أو يختار أثاث لازم يسأل أهل الاختصاص حتى لو دفع شوية زيادة أحسن مايجيب عمال من اي مكان ويخسر على التصليحات اكتر ..

    شكرا الدهليز على مواضيعك الحلوة
     
  5. وســـــام

    وســـــام تاجر مميز

    إنضم إلينا في:
    ‏19 يوليو 2009
    المشاركات:
    281
    الإعجابات المتلقاة:
    0
    مسا الخير ياسيدو
    والله يعطيك العافية على المواضيع الحلوة

    بالنسبة لأسئلتك بجاوبك ​


    هل تفريش البيت تهتمو بالسعر أول والا بالنوع والشكل ؟

    نحنا نهتم بالسعر والنوع والشكل
    نشتري من المحلات الكبيرة فترت التخفيضات وبكدا نضمن الجودة والشكل الحلو..


    ** لو في حاجة رخيصة عجبتكم رايحين تشتروها والا تسوو زي ناس مايهمهم الا السعر والفخفخة حتى لوكانت مبهوقة وشكلها مايتناسب مع سعرها ؟

    لوفي حاجة رخيصة عجبتني ممكن نشتريها بس مايكون شي قابل للكرف زي غرفة نوم ولا كنب يعني ممكن لوحة فازة شماعة ..
    ولو بشتري شي غالي لازم يكون باين سعره فيه..


    ** مين اللي المفروض يفرش البيت الرجال والا الحرمة والا النفرين سوااا ( مع انو التحطيم والعلت لاااازم منها وكل مين يرمي على التاني ) ؟ وبالزات العرسان
    لانه بتسير مشاكل ساعات بين العريس واهل الحرمة
    وتبغى تفرش على كيفها وتختار من الغالي والجخ وتفقع ضهر الولد وتزيد عليه مصاريف

    بالنسبة لمين يفرش لما كنا عرسان جدد كان الموضوع مشترك لكن الآن معظم البيت على ذوقي لأن بحكم جلستي في البيت أحب أشغل نفسي بتنسيق وترتيب البيت وأختيار الألوان وغير كدا درست ديكور وطبعا جوزي لو أختار شي أنا أنسق عليه المكملات..


    ** هل انتو راضين على فرش بيتكم بغض النضر إن كان قديم أو جديد قصدي من حيث التناسق ؟

    الحمدلله تمام الرضا لكن برضو كل فتره أحب أضيف لمسات للتغير..


    ** هل لو في ناس مختصة بالديكور والتفريش تزهموهم والا تسوو شغلكم على زوقكم حتى لو كان أي كلام ؟

    لا ماأفكر والحمدلله الذوق تمام بشهادت إللي شاف بيتي..


    ** هل لازم تغيرو الفرش كل سنة والا تمشو بيه لو فيه نفس والا انتو من جماعة خلاااااص الناس شافوه

    حسب الميزانية لكن مو نغير كل سنة..



    ( صـــــندقة مـــــرتبة ولاقصـــــر مكـــــركب )

    دا المسل ينطبق علينا والحمدلله على النعمة

     
  6. حمآمة مكة

    حمآمة مكة تاجر مميز

    إنضم إلينا في:
    ‏29 مايو 2010
    المشاركات:
    154
    الإعجابات المتلقاة:
    0
    ههههههههههههههههههههههههههههههههههههههههه
    مشكور جدو دهليزوو هههههههههههههههههههههههههه بس جد عني انا احب الالوان الفاتحه ممممممم مثلا سكري بيج وهيك يعني احسها فخامه للعرسان طبعا بس اللي عنده بزران ماتنفع لهم
    واريقاتو غوسايمس ع الموزوع القميل اوي خخخخخخخخخخ
     
  7. مكيه

    مكيه تاجره عطور ثقه 0595355584

    إنضم إلينا في:
    ‏11 نوفمبر 2008
    المشاركات:
    5,081
    الإعجابات المتلقاة:
    0
  8. @حسام@

    @حسام@ أبو عبدالعزيز

    إنضم إلينا في:
    ‏27 يونيو 2009
    المشاركات:
    612
    الإعجابات المتلقاة:
    0
    موضوع حلو .. وطرحك للموضوع احلى واحلى يا عمو / دهليز ..

    الله يباركلنا فيك ويطول عمرك ..

    وشكراً
     
  9. رتاج تاج

    رتاج تاج تاجر مميز

    إنضم إلينا في:
    ‏29 يناير 2010
    المشاركات:
    200
    الإعجابات المتلقاة:
    0
    هلا بعمو دهليز يارب يمتعك بالصحهوالعافيه
    موضوعك جميل جدا
     
  10. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته

    الله يصبحكم بالخير جميعا
    وربنا يبارك لنا في اليوم الفضيل ويتقبل صالح الاعمال والاقوال

    مرحبابك ستي رشة عطر
    انستي وشرفتي الله يعطرك بعطور الجنة زي ما عطرتينا بكلامك


    الغلا مو شرط بس الجودة هيا المطلوبة
    كلام حلو بس ازا تبغي الجودة لازم من الغلا
    لانه زي ماقال المسل الغالي تمنه فيه
    واشتري المكلف ولا تكلف

    وللأسف بعض التجار والبياعين
    علشان يبيع حاجات اصلية وكويسة يرفع السعر ضعف وضعفين
    ولمن تتكلم وتشتكي من غلا الاسعار
    يقلك مو انت تبغى حاجة طيبة ونضيفة وجودة :ang:

    الرك على النضافة
    يامحلى ست البيت لمن تكون شملولة وحركة وتحب النضافة
    بس مو لدرجة الوسوسة :p5088:
    لانه اغلب البنات فالتين شغل البيت على الخدامة
    وتنفضح البنت ازا سافرت الخدامة والا تعبت
    تلاقي البيت قايم قاعد زي حراج العصر
    وياما شفنا بيوت قبل وبعد الخدامات في فرق والله

    معلومات الالوان كنت جاهل بها بصراحة
    بس بعدين اتعلمتها من الناس

    وزي ما اتفضلتي الالوان الفاتحة تدي براااح ووسع في المكان بعكس لو كان غامق
    واشهر الفواتح الان هو اللون السكري ان كان في بوية عايدية او تعتيق

    وماشاء الله جات دحين اشكال والوان تعتيق وفلفت وشامواه ومخمل ووو
    الله يرحم زمن اول ينكحت البيت كلو بلون واحد اللهم السقف يترش ابيض
    علشان نور اللمبة يكشح وينعكس من البياض

    وكان اللون التفاحي والفستقي هو المنتشر

    وزي ما اتفضلت بيت الاخرة اهم واحسن من بيت الدنيا
    والله يبلغنا جميعا بيوت في الجنة ونكون جيران مع بعض
    قولو يااااارب

    يالله نستودعكم الله ونشوفكم على خير

    وخلونا نشوف اراء بقية الحبايب
     
  11. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    اللهم صلي وسلم على سيدنا محمد

    نسمع شوية اراء من الحبايب وبالزات من الرجال لانه الدفع عليهم وفت الورق

    وارجعلكم في الصبحية ازا الله اراد وكنا طيبين

    وفي امان الله
     
  12. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    وعليكم السلام ورحمة الله وبركاته
    تعيشي للخير ياستي شوكليتة
    وربي يطرح فيكي البركة ويكرمك بالستر والعفو والعافية

    المشكلة في الزوق
    كتير خلافات بتسير بين الراجل وحرمته على فرش البيت
    واحيانا زوق الحرمة مو حلو او الرجال زوقه بالبلا
    وكل مين يستعرض قدام التاني
    لا كدة احسن والا هادا احسن

    وعلشان نقصر الشر يامعشر الرجال زحلقو للحريم
    حتى لو كان زوقهم مو قد كدة
    وان جات الشغلة ليا اقلهم حلللللللللللو :021:

    خلو الحريم يفرشو البيت براحتهم علشان نفتك منهم ومن جناااانهم
    علشان لا تجي بكرة النهار وبعد سنة والا اقل
    تقلك يالله خلينا نغيره الباطرمة
    تقلها ياببنت الحلال طيب مافيلو ضربة
    تقلك من فين لأخته طيب مايكفي جايب لونه زي وشك ومايتحمل وصخ ودعك البزورة
    علين لونه طوس وراضية بيه وساكتة وكاتمة في نفسي :p5088:
    وطلعنا احنا الغلطانين واللي مانعرف نجيب :214:

    وان جيتو للحق هادا بيت الحرمة ومملكتها وهيا اكتر شي بتجلس وتنطق فيه
    علشان كدة زحلقووو

    وازا الرجال سلم من النكد حق العفش نسمع سيرة التغيير

    والله اعرف واحد ليلة العيد جاب الباطرمة من عند الرجال
    وكلفته بلااااااااوي زرقة
    والحرمة ما رضيت بالباطرمة وسوت شر ونكد
    قلها يابنت الحلال الوقت زنق والقابلة عيد مشي الكم اليوم هادي
    وبعد العيد نغيره
    ابداااا
    حط ابوك شيل ابوك شالت بعضها وعلى بيت اهلها :214::214::214:
    والمساكين البزورة عيدو بنكد وتنغيص علشان باطرمة لارااحت ولا جاااات

    ياستي عتبك على العين والراص
    بس شكوليتتنا غير شكوليتتكم

    وهادا مصطلح زمان كان متدوال في الالوان بشكل عام
    ازا كانت الالوان ملخبطة يقولو زي الشكوليتة
    والشكوليتة معناها مشكل وتشكيلات
    مو يعني حلاوة شكوليته هديك اللي تلصق في سقف الحلق
    وتجيب الكحة من قوة حلاوتها :p5088:

    يالله نريح شوية ونستنى بقية الحبايب
     
  13. عذوبة الصبا

    عذوبة الصبا كل عذب فيه مرارة

    إنضم إلينا في:
    ‏27 أغسطس 2010
    المشاركات:
    1,982
    الإعجابات المتلقاة:
    0
    الوظيفة:
    ثقافة ،،،اطلاع مو اكتر
    الإقامة:
    مديـــ منورة ــــنة
    موضوع حلو ويستاهل الطرح والنقاش
    المشكلة اللي اشوفها انو كل شي سار موضة
    تلاقي مافي تناسق ولا انسجام ولا ذوق ولا اقتناع احيانا
    بس مجرد مسايرة للموضة !!
    ديكورات والوان تجهر العين وتزغللها بدل ماتريحها وكلو عشان الموضة
    وصرعة السنة وتصميم فلان وعلان
    كلو كوم والجدار اللي كل جهة لون دا كوم تاني مدري كيف ينبلع
    ولا يكون الاثاث مو مريح ولا عملي بس منظرة وضخامة وابهة عالفاضي
    الاحسن والمتعارف عليه انو ست البيت هيا اللي تختار الالوان والديكور وغيرو
    لها حس وذوق في دي الناحية ومافي مانع يشاركها ابو الشباب اكيد
    الاختيار بالدرجة الاولى يكون للمناسب مع طبيعة البيت والمساحة وغيرو
    مو مهم السعر زي مو مهم الشي نفسو
    ودمتم سالمين
     
  14. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته

    الله يصبحكم بالخير جميعا
    مرحبابك ستي بيلسان انستي وشرفتي والله
    وحرد على كلامك حبة حبة

    حكاية الاستغلال والطمع من الاجانب معروفة
    وللاسف احنا حوجنا نفسنا للاجانب
    لمن سمحنا لهم يتحكمو فينا بطريقة مباشرة او غير مباشرة

    هو صحيح ساعات نزحلق لهم بس ازا بدهم يتفرعنو ويطولو لسانهم
    نلعن الجيد فيهم
    وايش نسوي زي ماقال المسل
    ان لك حاجة عند الكلب قله ياسيدي :021: الله يعز الجميع

    اما البويجي اللي جبتيه هادا حسودي لو انا منك والله لا اسربه واقله بطلنا ما نبغى شغل
    يمكن انت ما اشرفتي على العمال في شغلهم
    لازم العمال الواحد يوقف على راصهم كل يوم يومين يطب عليهم على غفلة
    زي موت الفجاة

    وحتى الفلوس ما تعطيها للبويجي او اي عامل الا لمن يكمل شغله على حسب ما تبغي انت
    مو حسب ما هو يقرر
    لانه في كتير ناس يقول للعامل ابغى كزا وكزا وكزا
    وانت سوي وهبب على كيفك ومالي الا ولد صالح

    علشان كدة العمال يشتغلو بكيفهم وعلى مراقهم

    الاتراك ما قد اتعاملت معاهم اللهم سلاااام من بعيد
    كل شغلي باطرمة لانه الكنبات والانتريه الطقم يكون محدود بكم حبة
    طيب وازا عندي ضيف وحبايب كتير
    في اجلسهم في الارض والا اجيب كراسي زي حقت العزا وارصرصها في الغرفة
    لكن الباطرمة حلوة تسويها داير مايدور وتشيل امم وناس

    ومن عيوب الكنب والانتريه
    يسوهها كبيرة والرجول صغيرة
    وازا جاء واحد ماشاء مليان وملفوف يطبق مناسم الكنب في الارض

    زمان كان عندي كنب وانكسرت الرجل ومو راضية تصلح
    جبت علبة تطلي وحطيتها تحت الكنب :p5088:
    من بعدها حرمت اجيبه
    وجارتك التركية شي طبيعي الاتراك يراعوها لانها تركية
    والدم يحن على قولهم وبنت بلدهم

    لكن لو كانوا سعوديين مايراعوك
    وهادي من العيوب حقت السعودة للاسف
    اننا نتفرعن على بعض الا مارحم الله

    راجع اكمل ردك ان شاء اله

    وفي امان الله
     
  15. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    ارفع لكم الموضوع تتسلو فيه
    علبال ما ارجع ان شاء الله واكمل مع الاخت بيلسان

    قوم يادهليز واقعد يادهليز وودي يادهليز ووجيب يادهليز وهات يادهليز وحط يادهليز
    مافي كلمة ارتاح يادهليز

    الله يريح الخواطر
    وفي امان الله
     
جاري تحميل الصفحة...

مشاركة هذه الصفحة