1. مرحبا بكم في أسواق ستي أكبر المواقع التجارية شعبية
    إستبعاد الملاحظة

{{{{ كــــان العيد}}}}

الكاتب: مكاوية بعسل, بتاريخ ‏10 يناير 2011.

  1. مكاوية بعسل

    مكاوية بعسل تاجر مميز

    إنضم إلينا في:
    ‏2 يناير 2011
    المشاركات:
    346
    الإعجابات المتلقاة:
    0
    منقول من كتاب
    لفيت
    السبع اللفات
    أدور حكم والألغاز وحكايات.


    للأستاذة/ عزيزة عبدالله محمد الصّيرفي.

    كان العيد ..



    وأنا بألمّلمّ قشي مسافرة بعد أدان الظهريّة
    قالت لي وحدة من الحبايب ليه ماتعيّدي هادي السنة مع الأهليّة
    قلت لها : آآآآه ثم آآآه على عيد زمان وأهلي حوليّة
    ومايشعر بونتي إلا إللّي ساكن حولين الحرم ياسعديّة.

    عيد زمان كان أحلى من عسل في زبديّة
    زماني ماهو من عام الفيل والعصّور الجاهليّة
    زماني قبل 10سنين هجريّة

    يوم كنا نقوم قبل صلاة الفجريّة
    نتروش ونلبس ملابس العيد الزهيّة
    ونروح الحرم بدري نسمع التهليل من المكبريّة
    ويطل علينا شيخنا المحبوب محمد السبيل بطلعته البهيّة
    يصلي بالمسلمين ويخطب خطبة العيدين بالمواعظ غنيّة

    وبعدها نخرج من الحرم مع الأمواج البشريّة
    ونمشي في الغزّة ومن أزقتها نخرج على الجودريّة
    هادول بنات لابسين فساتين منفّشة وأولاد بعقل مقصبة دهبيّة
    ونوصل الخريق نشتري من عم ناجي أحلى لقيمات وزلابيّة
    ومن جنبه فرن ناخد شريك حجرعلى معجنات بالتمريّة


    ونرجع البيت نلاقي سفرة العيد متمليّة
    منزّلة ومعرّق وفول ومعصوب وهريسة وحلاوة طحينيّة
    ودبيازة وجبنة وزيتون وأنبى وحلاوة شاميّة
    وبعدها يدوروا عليناعيال الحارة ياخدوا الريالات وخمشة حلاوة لوزيّة
    ونصب لهم الشربيت في كاسات بلون الفضة مطليّة

    ومن بعد صلاة المغربيّة
    يجونا بيت خالي محمد من العتيبيّة
    وعمي رشاد بأهله من الشاميّة
    وخالتي جواهر ببزورتها من السليمانيّة
    وتتوزع على العيال الهدايا والعيديّة
    وسمرة وجلسة حلوة متهنيّة
    ويبدؤاالعيال بالزن نبغى ننام فين العشى ياجدة تركيّة
    وبعد صلاة العشا بشويّة
    يجي العشى بديك الطليان المضبيّة
    وكل واحد يرجع على بيته ينام زي الخرقة المرميّة
    وتصير الدنيا هجدة ماهي الليلة اليتيمة متسميّة.

    سيبيني أسافر بعيد وأعيد شريط ذكريات الماضي المنسيّة
    بعد روحة الغزة وسوق الليل والجودريّة
    والنقى والشبيكة وجياد والسليمانيّة
    مابقي لي شي بروحتهم مع الشاميّة
    وعزايا الوحيد حبي لبلادي السعوديّة
    الله يزيدها تطور ومشاريع عملاقة عمرانيّة
    حتى تصير أحسن وأحلى بلد على الكرة الأرضيّة.



    توضيح لبعض الكلمات.




    بألمّلمّ : أجمع

    قشي : لوازم السفر.

    الشربيت : العصير.

    خمشة : مجموعة.

    منزّلة : من أنواع اللحوم مطبوخة بالطحينة.

    معرق : من أنواع اللحوم مطبوخ .
    بالبصل والطماطم والصّلصّة.
    الليلة اليتيمة : لخلود أغلب الناس للنوم.
    الخريق/ الجودريّة/ الغزّة/ الشاميّة /النقى/
    الشبيكة /جياد/ سوق الليل/ السوق الصغير/ السليمانيّة.
    كلها مسميات لأحياء حول الحرم تمت إزالتها مع التوسعة
     
  2. فوز مكه

    فوز مكه تاجر مميز

    إنضم إلينا في:
    ‏31 أغسطس 2010
    المشاركات:
    311
    الإعجابات المتلقاة:
    0
    سلمت يداك على النقل الرائع
    ونحن في انتظار القادم الاروع
    ان شاء الله
     
  3. مكاوية بعسل

    مكاوية بعسل تاجر مميز

    إنضم إلينا في:
    ‏2 يناير 2011
    المشاركات:
    346
    الإعجابات المتلقاة:
    0
    فوز مكه.. الله يسلمك..وابشر بالجديد..

    مشكورعلى الرد..
     
  4. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,635
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    سامحك الله يا مكاوية كلام يقشعر البدن من جد
    مني داري علين متى نفضل في كلمة كنا وكنا وكنا
    مافي كلمة دحين وهادي الايام

    فكرتيني بواحد بيشتكي من حرمته دايما تقله جيب معاك جيب معاك جيب معاك
    واحد يوم كان متكفرن ودمه فاير هبق في حرمته قلها بس افتري
    طول عمرك هات هات جيب معاك عمرك في حياتك ماقلتي خد

    قالتلو ولا يهمك خد الورقة هادي وجيب الطلبات :021::021::021::021:
    طبعا المعرق والمختوم زي بعض او اللي يسموه ايدام دجاج ياعيني على الدلع

    والعشي هو الطباخ
    وقالوا في الامسال
    اللي عنده عشي مايزفر يده
    قصرو
    احاول انغبش في نافوخي شوية زكريات عن العيد
    بس عبو الكمامات :eek:
     
  5. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,635
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    يعني زمااااان لمن يجي العيد ويضربو المدافع تلاقي الناس كلهم يعايدو بعض ويهنو نفسهم على ان من الله عليهم صيام رمضان وقيامه
    ويسألوا الله القبول حتى اللي متخاصمين ومضاربين حتى لو لهم سنة مايهرجو مع بعض يجو ويسلمو على روص بعض ويعتزرو من بعض في المركاز حق العمدة مو علشان شي علشان العيد فرحتو كبيييرة ولازم الواحد يكون خاطرو مريح ومو شايل على احد على قولهم وحتى ربنا يطرحلهم البركة


    وبعدين يروحو يجيبو حوايجهم من الخياط واللي يقضي امورو وحاجتو واللي يشتري الحلاوة والشربيت واللي بدو يجيب نقل ( مكسرات ) على كيفو

    طبعا عوايز العيد والدبهرك حق العيد يبدأ الاستعداد حقو من يوم 20رمضان الا هيا العشرة الاخيرة واللي يسموها عشرة الخياطين والحلاوانية والحلاقين

    يعني يعبو البيت اللهم صلي على النبي من إلى
    وبعضهم اللي بيتو نص ونص ( يرخموه ) يعني يجيبو رخام وقليل جبس
    ويدعكو البيت من برا يسير يلمع ويبرق ويكشح لونو ابيض زي البفتة
    واللي الله منعم عليه يقدح البيت بوية والحريم جوة يغسلو الدهليز والدرج
    ويبيتو الليانات والمخدات والمساند بهديك البيوت المشتغلة
    واللي فيها كرانيش وترتر يعني زبرقة من صنع الحريم
    وبعدين يرقدو على الساعة 12 / 1
    ويصحو قريب الصبح يتروشو ويتزبطو ويتخشلعو وينزلو للحرم يصلو الصبح وبعدين يصلو المشهد وبعدين يروحو لأكبر واحد في العيلة ويفطرو عندو مع الاهلية والحبايب

    وناس بعد صلاة المشهد يروحو للقبور يزورو الاموات ويدعو لهم
    وبعضهم يخلو الزيارة بعد الفطور
    وبعضهم لا زيارة ولايفتكروها بريال عيش


    (دبيازة ولقيمات او اللنقطة وزلابية وشريك بلدي وجبنة وحلاوة وزيتون
    وشويتين أمبة وطرشي للتحديقة واللي خرمااااان للفول والهريسة يجيب على قدو قيد الناس طفشانة من سيرة الفول حق رمضان وغيرها من الاكلات على حسب مراق أهل البيت وفي ناس كمانة يحطو ايدامات ملوخية وبامية ووو وكل مين وتصنيفتو )
    ولو انو الهرجة هادي قامت تختفي شوية وصارو الناس يفطرو في بيوتهم وبعضهم لا يفطرو ولا يهببو
    لمن يرجعوا من الصلاة يندبجو وتاخدهم الخامودة علين يشبعو
    وبعضهم بدل الفطور يسوو عشوة في الليل قيد الدنيا عيد وسهر وصهللة


    وبعدين المعايدة والتزاور عيد الرجال كان في الصبح علين قبل الضهر وفي العصرية دور الحريم والبزورة
    مو زي دحين انقلبت الاية والناس كلها تندر تعيد في الليل بدل الشلوطة في النهار وخصوصا ازا كان حر ولسلسة علشان كدة الناس خلت المعايدة في الليل علين وجه الصبح


    المهم كانوا ماشاء الله شباب ورجال الحي من كترتهم تبارك الرحمن
    يقسموا نفسهم 4/5 اقسام وكل قسم كان يعيد على حارة من الحواير القريبة
    اهل الشامية يطلعو للفلق واهل الفلق يروحو للشبيكة واهل الشعب يروحو للنقا واهل السليمانية يروحو على سوق الليل يسير هدولاك يردو رجولهم
    مرة تانية
    وهنا تجي هرجة البرزاااات
    وهيا صواوين يجيبو التيازير حقت الخيام ويفردوها من اول الحارة لأخرها ويزينوها بالعقود حقت اللمبات
    طبعا اول الاتاريك وشوية شوية جات اللمبات الملونة
    وكل عمدة يزبط مركازه شكل ويعبيه من الى قهوة وعصير وحلاويات يسير اهل الحارات التانية يعيدو على بعضهم وغير السهرات اللي كانت تسير جوة البرزة ولعب مزمار وبكش علين تغلق التلاتة ايام حقت العيد


    ومن الحاجات الحلوة زي منتو عارفين أول أهل الحي عارفين حيهم ومين اللي ساكن معاهم وعارفين
    اللي ساكنين فيه من البزرة علين الحرمة والبنات بحكم انو الاحياء صغيرة وضيقة ومافي رجل غريبة بينهم علشان زي منتو عارفين الجيران زي الاهل فكانوا
    لمن يعيدو ومايلاقو رجال البيت يحمحم ويزهم ( يأهل البيت
    يا أم أحمد كل عام وانتو بخير والله يعيدو علينا وعليكم بالخير )
    ودلال القهوة جاهزة وحلاوة الحلقوم واللوزية واللومنية وبيض الكوكو للبزورة والا على ايام اللدو الاحمر اللي حباتو قد البرجون واللبنية والفوفل

    مو زي دحين على حسب ماسمعنا انو حلويات العيد اسعارها فوق ال200 ريال لااا وبالطلبية والحجز ولازم بوقت طويل
    وكلها فشخرة علشان الدكاكين فخمة ويلبسوها تلبيسة سيارات وبطة وفراشة وام طقة سووها ب200ريال وواحد من الارحام اكل سرا العام الماضي في باتشي
    يقلي قدامي صف طويل عريض وجالس يبربر
    قلتلو اللي يبغى الدحة لا يقول أحة
    هيا روح فارقنا بلا نفرزة :ang:
    دايما اشتري قراطيس جلكسي واخواتها وانكتها في التبسي والناس تاكل
    بلا باتشي بلا هباب
    ودحين اشكل الناس معاهم سكر وما ياخدوها
    انا اضايق من اللي يلزم عليا في الحلاوة
    يمكن اكل حبة ازا كان السكر نازل
    بس مو في كل بيت لازم ناكل وصرت احطها في جيبي
    ومرة ركبت السيارة وجلست عليها ونكبتلي التوب :214:

    يالله راجعلكم ان شاء الله
    نكمل ورورة :p5088:
     
  6. مكاوية بعسل

    مكاوية بعسل تاجر مميز

    إنضم إلينا في:
    ‏2 يناير 2011
    المشاركات:
    346
    الإعجابات المتلقاة:
    0
    سامحك الله يا مكاوية كلام يقشعر البدن من جد
    مني داري علين متى نفضل في كلمة كنا وكنا وكنا
    مافي كلمة دحين وهادي الايام..




    نأسف للنقل ياسيدي الدهليز الذي لم يرق لكم .
    لقدمه منذوا 10سنوات ..وإذا وجدنا شي جديد
    لليوم واليومين نقلناه لكم ..على العموم مشكور..
     
  7. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,635
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته
    مساكم الله بتوب الكعبة
    على ايش تتاسفي ياستي
    شكلك مافهمتي قصدي
    انا قصدي من الهرجة متى يجي اليوم اللي نرجع فيه للي كنا عليه
    صحيح هادا يعتبر حلم ما راح اقول مستحيل بس مافي شي على ربنا بعيد
    لانه الوضع في الزمن هادا اللي احنا عايشين فيه وضع ملخبط ومخربط على الاخر
    لا عيدنا عيد ولا عزايمنا عزايم ولا فزعاتنا زي زمان

    ستر ما مضى يستر مابقي
     
  8. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,635
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    المهم

    الديوان او المجلس اللي بعد الدهليز على طول مزبط من إلى وبعدين في دفتر صغير كدة ومرسمة يسير يقيد اسمو في الدفتر انو جاء وعيد في البيت
    يسير لمن يجي رجال البيت يمسك الدفتر ويشوف مين اللي جاء يسير يرد رجولو ويعيد عليه وفي حاجة حلوة أول كل بيت يحط في المجلس تلاتة اربعة اشكال من الكلونيات يسير الضيف يعطر نفسو او صاحب البيت
    يعطرو مو زي دحين لو تسوو الحركة هادي يقلك روح وفارقنا انا عندي عطري الخاااااااااص والا يقلك ليش شايف ريحتنا زي التيوس
    علشان كدة تبغى تعطرنا !!!!

    ااااااااه نتكلم عن ايه ونسيب ايه
    والا على لفات البزورة على الجيران
    وكل وحدة تفك الباب وتندر معاها كيس مليان مكسرات وحلويات تخمش بيدها وتملي الجيوب
    واللي عندها قروش وتفاريق تعيد علينا

    ياسلام الحقد والكره والحسد والله ماكنا نعرفها
    نزعل نغضب نتعفرت وتوصل للشيطان الرجيم نص ساعة بالكتيرالا كل شي رجع زي ماكان

    وازا كان العيد طويل كانوا الأهلية على سادس ايام العيد يتلمو كلهم
    ويروحو يتمشو وينفهو على أهاليهم وبزورتهم قيد طول رمضان
    والحريم والبنات محبوسين في المطبخ والبيت طبيخ ونفيخ


    سبحان الله على هديك الايام لو بدي اتكلم بالتفصيل يروح الليل في هضم الهيل قلنا كدة نتزكر على خفيف اصلا دحين العيد عيد العافية ودحين اللي يفرح بالعيد هم البزورة الصغار اكتر من الكبار
    تشوفهم مبسوطين وهم لابسين الدحة حقتهم والكرتة وماسكين ايادي بعض يروحو للمشهد ويقرمشو في الحلويات ويزوووطو فيها علين تتنكب الحوايج وبعدين ياخدو العيدية ويمبسطو فيها
    يمكن علشان ولفنا واتعودنا على عيد اول وعلى قد ماهو بسييييط ومكنكن لكنو حلو
    دحين العيد معناتو الحوايج الجديدة صح والا مو صح ؟
    اول كنا نفرح وحنلبس الحوايج الجديدة
    بحكم المعيشة والحالة الصعبة ( والحمد لله على كل حاال )
    كانو يلبسوا الحوايج الجديدة في العيد وبعد مايغلق العيد يرفعوها في الدولاب
    يسير لمن تجي عزيمة والا مناسبة يلبسوها
    لكن دحين ماشاء الله الوضع اتغير وصرنا الحمد لله نلبس الجديد كل شهر وفي كل مناسبة ( الله لايزيلها من نعمة ) قولوا الحمد لله
    وغير المداس الشرقي او الحدا ( الله يعزكم )
    نفضل نخرج وندخل فيه من الدولاب نقيسو كل يوم
    وليلة العيد نبيتو جمبنا على الطوراحة يايعني لايروح يضيع والا احد يصرقو ( فرحة جهاااال )


    العيد عيد العافية
    وعلى قولهم ازا عافاك اغناك

    حاجة بسيطة كدة
    في بعض الاسر يعيدو في المدينة المنورة اللهم صلي وسلم على سيدنا محمد
    يتلمو من يوم 25 رمضان وعلى المدينة


    حاجة اخيرة العيديات اول كانوا يشتروا بيها بسكوليتات
    والعاب وبعضهم يعطيها لابوه من باب المساعدة
    اما دحين يضيعوها في الملاهي والتماشي على البحر وغير الطراطيع
    وعلى قولهم كل مين حر في مالو وعيديته


    بعض الاسر اللي ربنا اتوفى احد افرادها كان ماعندهم عيد هديك السنة
    وكل واحد يجي يعيد يقول كل عام وانت بخير والله يرحم اللي ما انعاد عليه
    وبعضهم كان ياخدها من قاصرها ويفقع على المدينة
    يسير الناس تعرف انه ماعندهم عيد
    وبدل الحلاوة يقدمو تمر وقهوة

    والله يجعل ايامكم افراااح واعياد ان شاء الله
     
  9. مكاوية بعسل

    مكاوية بعسل تاجر مميز

    إنضم إلينا في:
    ‏2 يناير 2011
    المشاركات:
    346
    الإعجابات المتلقاة:
    0
    وعليكم السلام والرحمة والإكرام ..
    {{على ايش تتاسفي ياستي
    شكلك مافهمتي قصدي}}



    حصل خير..... أظن وقتها كنت أفهم {{{بالاوندي}} هيا إن كنت مكاوي حتفهمها .

    مشكور على الرد والإفادة الممتعة. عرفت منها معلومات كنت أسمها من أمي ..ماقلت لك {{كنز}} تبارك الله عليك..أنا ومن يقرأ لك معلوماتك حنستفيد منك كثير.. الله لايحرمنا منك ومنها. ياسيدي الدهليز.
     
  10. مكاوية بعسل

    مكاوية بعسل تاجر مميز

    إنضم إلينا في:
    ‏2 يناير 2011
    المشاركات:
    346
    الإعجابات المتلقاة:
    0


    أخي الدهليز...
    على فضوتك ... لوتكرمت تعدد غرف بيوت زمان مثل [ المخلوان ..لإيه؟.....المبيت لإيه؟ والباقي ..].
    أحتاج معرفتها لتكملت البحث. وعلى قولهم سلامة وجهك في هذا الزمان الكثير مايعرف وإللّي يعرف ينكر مافيه يتهرج على زمان وغبر..... ومشكور مقدماً.
     
  11. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,635
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته
    <O:p</O:p
    الله يصبحكم بالخير جميعا<O:p</O:p

    سيدك مولاك
    ابشري ياستي

    نكتب عن بيوت زمان ونستنىمشاركة بقية الحبايب
    شوية مني على شويات من التاني والتالت وفي الاخير يترستك الموضوع وكلنا نستفيد
    <O:p</O:p
    يعني ايش بدنا نقول المسميات القديمة هي لازالت موجودة الى وقتنا الحاضر<O:p</O:p
    بس لانه الناس ولفت واتعودت على التغيير والتجديد حتى الكلمات والاسامي اتغيرت<O:p</O:p
    يعني زي المركب هو دحين المطبخ <O:p</O:p
    وبيت الما او بيت الماء او بيت الراحة هو الحمام اللي يعزكم جميعا<O:p</O:p
    الدهليز او السيب دحين لازال موجود <O:p</O:p
    بيت الدرج او فحل الدرج يعني المكونات موجودة لكن اتغيرت اساميها<O:p</O:p
    <O:p</O:p

    نبدأ من الشارع الرئيسي ينفد على الحارة ومن الحارة شوارع ضيقة يسموه زقاق<O:p</O:p
    ومن الزقاق يجي البيت واول حاجة تقابلك العتبة حقت البيت <O:p</O:p
    ازا كان البيت عالي شويتين يسوو العتبة مرتفعة شوية علشان الحريم وكبار السن يطلعوا بسهولة
    <O:p</O:p
    بدل ما يشنقلو رجولهم ويفرشخوها حتى يطلعو على البيت يكفي الدرج
    بالزات البيوت القديمة تكون الدرجة واقفة والواحد يبغاله يرفع رجوله حتى يطلع
    كأني أبغى أضرب ركبة في اللي قدامي بس على قد ماكانت عالية ومشنقلة
    وياما ادردبت بطولي في الدرجان بس كانت مبروكة الحمد لله نقوم زي العفاريت
    بعد العتبة بشوية يسوو ارتفاع بسيط قد شبر<O:p</O:p
    يسموه مرد علشان يرد الموية حقت المطر لو حطت ماتخش وتملي الدهليز بالموية ويغرق ديك الساعة<O:p</O:p
    والعتبة هادي واجهة البيت واول ما يقابل الناس علشان كدة لازم تكون حلوة ومزبطة ومرستكة<O:p</O:p

    الدهليز اكيد تعرفوه مو انا <O:p</O:p
    فايدة الدهليز سترة لأهل البيت يعني المعاونية والصبيان اللي يجيبو مقاضي اوي أي شغلة<O:p</O:p
    يخلوها في الدهليز ولمن يندرو ينزلو الحريم ويشيلو الاغراض وازا جو ضيوف او ناس اغراب<O:p</O:p
    يحمحمو ويطرقو لنفسهم ( طرييييق ياولد يا ابو فلان ويا ابو زعطان )<O:p</O:p
    غير كدة الدهليز يسير زي موزع الهوا سبحان الله ايام الحر ينزل الهوا الحار من كل البيت على الدهليز<O:p</O:p
    ويطلع البارد على فوق يعني ياخدله دورة كاملة وبالعكس في الشتا زي هادي الايام من جد اهل اول عليهم امخاخ<O:p</O:p
    تفكر ومافي شي عندهم بالبهللة كل شي بحساب ومقياس<O:p</O:p
    وبعض البيوت يسوو البدروم وناس تسميه بدرون وناس تسميه بندرون <O:p</O:p
    عارفين اهل اول محلااااااهم في خلف مطن الاسامي زي الجرة يسموها سجرة <O:p</O:p
    بعد كدة يجي بيت الدرج او فحل الدرج كانوا برضهم يخشخشو فيه القرمبع الزايد <O:p</O:p
    وكل واحد ساكن دحين في عمارة ينزل تحت الدرج يلاقي فسحة هادي يسموها بيت الدرج او فحل الدرج<O:p</O:p
    وبعض العماير يحطو باب الاصنصير في بيت الدرج<O:p</O:p
    بعض البيوت بعد بيت الدرج يسوو الجيلا وفايدة الجيلا للتهوية والنور للغرف الداخلية واللي مالها طيق تنفد على برا <O:p</O:p
    ايش يسوو ينكتمو يعني لاهوا ولا شمس ولانو ر ربنا يشوفوه<O:p</O:p
    علشان كدة سوو الجلا هادا واللي كان عنده عشقة للطليان يربيهم في الجيلا<O:p</O:p
    يسير يفتح لهم الباب في العصرية ويندرو مع الدهليز على الزقاق <O:p</O:p
    ولازم يفرش الجيلا بالتراب والحصاوي وبودرة الخشب علشان اعزكم الله لايتعبى وصخ الطليان<O:p</O:p
    ويضرب البيت بالريحة والعفنة وساعتها <O:p</O:p
    تسمع اهل البيت يقلك احرق خرقة <O:p</O:p
    يعني من قلة البخور نقوم نحرق خرقة او وصلة قماش علشان تروح الريحة<O:p</O:p
    طيب مو في مستكة ليش مانبخر بيها <O:p</O:p
    ناس انتيكة من جد
    <O:p</O:p
     
  12. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,635
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    <O:p</O:p
    واسفل البيت يسوو الخزانات والحنفيات حقت الموية ويعبو من السقا لانه السقا هو اللي كان زي الوايت ماشاء الله<O:p></O:p>
    والناس تزعل اهلها ولا تزعل السقا لانه لو السقا زعل معناتو انقطعو من الموية يمشو شغلهم بالحجار والورق <O:p></O:p>
    وفضايح السقا يندرها اللي يسهلو في الجدر حق البيت يكتب هادا باقيلو كزا وهداك باقيلو كزا علشان ماينسى<O:p></O:p>
    واللي زعلان ومضارب معاه يسوي علامة ضرب على البيت <O:p></O:p>
    الديوان والمقعد والصفة هادي مسميات لغرف الضيوف اكبرها الديوان والمجلس والقاعة <O:p></O:p>
    والصفة اصغرها زي ماتقولو ملحق صغير <O:p></O:p>
    المركب طبعا تعرفو المطبخ وزي مايقولو المركب مكركب زي حراج العصر<O:p></O:p>
    الطيرما والمبيت غرف في اعلى السطوح ناس تقعد فيها وناس يخلوها للتخزين <O:p></O:p>
    زي الدقيسي المخلوان غرفة تتخزن جوتها المونة والارزاق وتكون مخشوشة في اخر البيت بعيد عن الهوا والرطوبة والحرارة<O:p></O:p>
    وتنحط جوتها النملية وطبرواية العيش وتكون معلقة ومدلدلة من السقف علشان لا يجي الضر والصراصير والفيران<O:p></O:p>
    للاكل اللي رافعينو دوتها<O:p></O:p>
    وبرضو في الغرف يسوو المصروقة او السقيفة <O:p></O:p>
    شايفين الجبس الساقط او النازل هادي الايام <O:p></O:p>
    نفس الطريقة ياخدو متر من الجمب ويسووه بالخشب ويحطو في القرمبع الزايد والواجهة يحطولو ستارة بالقماش<O:p></O:p>
    علشان يندس الحراج بس بصورة حلوة ومأنتكة والسقيفة ما تطيح الا على الضعيفة <O:p></O:p>
    كنت اندس جوة السقيفة وقت الفرش والضرب بين القدد الخشب والمسامير <O:p></O:p>
    وخلي امتن شنب يخش جوة غير ينعزق <O:p></O:p>
    واللي كان يبغى يفطر في رمضان وعلشان لا ينكشف يقوم يندرق في السقيفة ويطفح على كيفه<O:p></O:p>
     
  13. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,635
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    نفس الطيق اللي يسموها دحين نافذة<O:p></O:p>
    كانو يغطوها بالرواشين وهيا اعمدة من الخشب تكون محوطة الطاقة داير مايدور <O:p></O:p>
    وفايدتها سترة لاهل البيت واللي يشوف ما ينشاف على قولهم<O:p></O:p>
    ويسوو لها بروزات نادرة لبرا يسموها المشربية وتنحط جوتها الشراب والازيار حقت الموية<O:p></O:p>
    يسير الهوا يقدحها ويبرها وتحت المرفع اللي فوقه الشراب والازيار تنحط كروانة يحطو جوتها البيض<O:p></O:p>
    لانه زي منتو عارفين الترشيح حق الشراب والازيار يندر من الجرة ويكون بارد<O:p></O:p>
    فيحطو البيض جوته علشان لايخرب وسبحان يارب<O:p></O:p>
    طبعا الروشان لو اترفع وانفك من الطاقة في ستارة من الخشب زي عيدان الساتي او امتن شوية<O:p></O:p>
    يسموها كبريتة وبعضها فيها قلابات تترفع للقفل وتترخي للفتح<O:p></O:p>
    زي شبوكة المكيف او قلابات المكيف <O:p></O:p>
    شايفين قد ايش زمان كانوا حريصين على اهل البيت وستر المحارم <O:p></O:p>
    مو زي دحين الطيق مفتوحة للجميع وتندر الحرمة بشوشتها وهيبتها وتزهم على البزورة <O:p></O:p>
    هادا ازا ما دقت سيجارة في الطاقة ازا كانت تشرب دخان وهباب <O:p></O:p>
    زمان عيب صوت الحرمة يطلع كانت تصفق بيدها والبزورة يجو على البيت <O:p></O:p>
    طبعا صفيق بادب مو تصفق زي وتر وسمر زي الحونشية او تندرق ورا الباب حق الزقاق وتزهم بشويش على البزورة<O:p></O:p>
    لانه اللي يتحير لبعد المغرب الله يعينه وهو داخل ياكل كفين تلاتة على ضهره وتسمعهم يقلك بطال<O:p></O:p>
    البزورة يجلسو لبعد المغرب وبالزات البنات<O:p></O:p>
    <O:p> </O:p>
    اغلب البيوت كانت تسوي جمب الباب دكة محل التبشيك حق الجيران<O:p></O:p>
    زي المركاز قد مترين في مترين وينفرش الحنابل والمساند والليانات<O:p></O:p>
    وقت العصرية الطويلة او الجو المغيم وبين المغرب والعشاء يبشكو عليه الرجال<O:p></O:p>
    ومايجي العشاء الا كل مين ينزل للحرم وبعد كدة يتفرتكو كل واحد على بيته<O:p></O:p>
    وهادا غير اللي مستور وعلى قد حاله يسوي العشة وهيا من الخشب او السعف والجريد حق النخل والشجر <O:p></O:p>
    طبعا زمان كانت الفرفيرة هيا المنتشرة في الابواب لتقفيلها <O:p></O:p>
    دحين لو قلت لواحد تعرف الفورفيرة يحسبها حقت الاولاد الكورة<O:p></O:p>
    الفورفيرة قطعة خشبية شايفين عود الايسكريم الخشب نفش الشكل بش يجي متين <O:p></O:p>
    تتسمر بمسمار في حرف الباب يسير لمن ينقفل الباب تتحرك الفورفيرة وتقفل الباب<O:p></O:p>
    زي الزرفونة الايام هادي <O:p></O:p>
    بس في طريقة تحتال على الزرفونة وهيا تمسك الباب وتجبده بقوة على جوة تقوم تترخي الزرفونة<O:p></O:p>
    وهادي اخرة العكرته حق زمان هادا العيب الوحيد في الفرفيرة<O:p></O:p>
    بالزات لو كانت مهي مسمرة مزبوط والمسمار كان محلول لانه مايسير المسمار يندق للاخر <O:p></O:p>
    علشا يكون في مجال تتحرك الفرفيرة يمين شمال <O:p></O:p>
    وسامحونا طولنا عليكم وقروشنا راصكم <O:p></O:p>
    واللي يفتكر شي يقيده يسير كلنا نستفيد <O:p></O:p>
    قريب ساعة ونص وجالسين نكتب علين جانا الفتفت <O:p></O:p>
    وكل شي لأهل مكة يهون والله <O:p></O:p>
    وفي امان الله <O:p></O:p>
     
  14. مكاوية بعسل

    مكاوية بعسل تاجر مميز

    إنضم إلينا في:
    ‏2 يناير 2011
    المشاركات:
    346
    الإعجابات المتلقاة:
    0
    السلام عليكم ...بوركت أخي الكريم ..

    تسلم الأنامل.صادق والله أخذت منك جهد ووقت طويل هذه المعلومات في الكتابة .ماأقول سوى الله يجزيك بكل خير على تعبك الذي أقدره لك وعلى هذه المعلومات التي تكتب بماءالذهب لكل من أراد الإستفادة منها .بارك الله لنا فيك ومن جميع الخيرات يعطيك ..تجدها في ميزان الحسنات إن شاء الله. يا [[[ ياكنزنا الغالي]].


    ممكن إستفسار..!!! أُلاحظ كلمة {{ علين }} تكرر بين كلماتك ونحن في مكة نقول كلمة [[ألين ]] ما السبب؟
     
  15. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,635
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    وعليكم السلام وحرمة الله وبركاته
    ياستي جزاك الله خير ومشكورة على الدعوتين الحلوة وهادي غايتنا

    علين الين كلها تمشي الحال والغرض
    بس هو زي ماتقولي خلف المطن اللي اتكلمنا عليه
    زي سجرة وشجرة :052:
    الطازج يعني جديد يسموه طاجز :052:
     

مشاركة هذه الصفحة