1. مرحبا بكم في أسواق ستي أكبر المواقع التجارية شعبية
    إستبعاد الملاحظة

{{{{عزيمة جواز }}}}.

الكاتب: مكاوية بعسل, بتاريخ ‏7 يناير 2011.

  1. مكاوية بعسل

    مكاوية بعسل تاجر مميز

    إنضم إلينا في:
    ‏2 يناير 2011
    المشاركات:
    346
    الإعجابات المتلقاة:
    0
    منقول من كتاب:

    لفيت
    السبع اللفات
    أدور حكم وألغاز وحكايات.
    للأستاذة/ عزيّزة عبد الله محمد الصّيرفي.


    {{{{عزيمة جواز}}}}.


    دق الجوال علِّي طلعتْ جارتي القديمة أم حسين.
    ومن بعد السؤال عن الحال والأحوال قالت لي معتازة سلف منك ولو ألفين.
    جواز ولدي محمد وإنت طيبة بعد أسبوعين.
    وشُوفينا ندور سّلف من مكان لمكان محتاسين.
    نبغى نسويله فرح يشّن ويرنْ ونعزم كبار المسوؤلين.
    زي جواز ولد عمه عبدالله وبنت عمته صابرين.
    قلت في نفسي :
    وعلى إيه داه كله مدام منتوا قادرين .
    يعني لازم تحطوا رآسكم برآس الناس الباقين .
    رجعت وقلت لها:
    أبشري عندي قرشين مدسوسين.
    أبغى أحبيب بها شغالة من الهند أوالصين.
    أرسلي مرسولك إن شاء الله بعد يومين .
    ولو تقدري ترديها ليّا بعد شهرين.
    دعت لي وأرسلتْ مرسولها ومعاه كرت الدعوة ببطاقتين.

    يوم الخميس ليلة الجواز أخدت بنتي ورحنا مبدّرين.
    لانتأخر وتتملى الكراسي بالمدّعوين.
    ونوقف ساعة على رجولنا ملطوعين.
    وعبال مايجيبوا الكراسي أتصلبت الركبتين.
    كان الفرح حلوا ومرستك وأنبسطوا الموجودين.
    لكن مجغوها في الأخير بطول الزفة ساعتين.
    وبموسيقى تصنج برجتها حتى الجن والشياطين.
    ساعة يقطعوا الكيكة وساعة يشربوا العصير بشفاطتين.
    وخطوة خطوة يمشوا للكوشة والعروسة مزغودة حبتين.
    ومايوصلوا لها أللين تنفقع المرارة والكليتين.
    والمصّورة مسويّة فيها كبيرة المبّدعين.
    تصوركل حركة بحركتها وإذا ماعجبتها يعيدوها مرتين.

    ولو نجي للحقيقة إش ذنب الجالسين.
    يتعاقبوا بفرجة ولطعة مالها رغبة عند الكثيرين.
    همَّ للواجب متعنين وجايين.
    ومايبغوا يشوفوا كل حركة بين الإتنين.
    ويتابعوا كل خطوة بخطوتها للعروسين.
    وأحيانا يشوفوا مسخرة وقلة حيا ودين.
    بوّلِدة ورجال داخلة ترقص وتستعرض وتهز الكتفين.
    ومنهم توصلبوا القباحة يربط وسطه وهاتك هز على الجنبين.
    ولو جا أحد يخرج وتقوا فيه البوابين.
    ماتخرج لازم تدخل الميز .. الناس مكلفين.
    ولا يفتحوه إلا بعد طلوع الروح والعين.
    ياريت تبقى صجة الزفة لأهل العروسين.
    أهلهم يفرحوا بيهم وبلاش ربطة الحاضرين.
    إللي قدروهم ويمكن من عندهم على بلدهم مسافرين.


    المهم.

    دخلت أنا وبنتي ناكل لنا لقمتين.
    وأخدنا في الصحن إلا فيه الرزق والنصيب حبتين.
    وجلسنا على طاولة كبيرة فوق كرسين.
    وجو بنتين نحاف حاشفين كأنهم جرادتين.
    كل وحدة ماسكة في يدها صحنين.
    مطفحينها من مالذ وطاب لحد العين.
    قلت في نفسي:
    تبارك الله عليهم من بنات شاطرين.
    جابوا العشا وأهلهم وراهم جيين.
    أستسمحونا يجلسوا معنا قلت:
    بس المكان مايكفي باقي أهلكم ياحلوين.
    قالت وحدة منهم : مافي أحد غيرنا البنتين.
    قلت: أتفضلوا أجلسوا كلوا بهنا وصحتين.
    وفي نفسي أقول :
    ماشاء الله على زي هادول ناس ياكلوا دا الأكل كله وهم ناشفين.
    ياعيني على بعضهم لو أكل حبة حلاوة يصير متين.
    وأنا باكل شفت وحدة {ياهم ليلي} تقطع اللحمة بالسكين.
    وتغرز الشوكة فيها وتمسكها بسنتين.
    قلت لها : سم بالله حبيبتي وكلي باليمين.
    كملنا أكل وسألت وحدة من الأختين.
    إنتم من أهل العروسة ولا من أهل العريس ولامن الإتنين.
    جاوبتني وحدة منهم وقالت:
    لا...العروسة بنت خال زميلتي نسرين.
    عزمتنا إحنا ..وأهلنا في البيت قاعدين.
    قلت ومين وصلكم ياحلوين ؟
    قالت سواقنا تحسين.
    قلت وأهلكم مايخافوا عليكم يفلتوكم في الليل مع السواقين.
    قالت وحدة منهم : أهلنا فينا واثقين.
    قلت في نفسي:
    عزالله من أهل حرصين .
    يفلتوا بنات في عز الليل من تحت العشرين.
    ولما يوقع الفاس في الراس وتصير المصيبة تلقاهم باكين.
    وإذا دخلوا بناتهم السجن تلقاهم نادمين.
    وقتها ماينفع الندم وتتلطخ سمعتهم بالطين.
    كمّلنا صحننا لاتجري اللقمة ورانا زي ماقالوا الأولين.
    وحليت بكم حبة عنب وتين.
    وشفت البنات يمسحوا أيادهم بعطر الياسمين.
    قلت خير كملوا أكل هادي الصحون المليانين.
    قالوا: خلاص شبعنا لانتخن ونصير زي البراميل.
    قلت وهادا الأكل الزايد إللّي سبتوه ياطيبين؟.
    قالوا : يرموه في الزبالة الشغالين.
    مشيت وأنا أقول :
    أللّي صايب الناس موو فقر بل سوء تدبيرمن زي هادول بطرانين.


    حز في نفسي وأنا خارجة من قاعة الطعام وناس داخلين.
    يدوروا أكل في طاولة الميز بين الصحون الفارغين.
    مالقوالهم لقمة نظيفة ياكلوها المساكين.
    وخرجوا من القاعة وهم جيعانين.
    والأكل ملطلط فوق الطاولات في صحون مالمستها اليدين.
    دقيت على ولدي يجينا قال أبشرك ياامي أنفقعوا الكفرين.
    دخلت بالغلط شارع كانوا حاطين فيه مسامير واقفين.
    أنتظري شويّة أستكري وأجيك بلموزين.
    قلت وهي الحكايّة ناقصتك إنت كمان ياولد عابدين.
    الود ودي أرجع البيت قوام وأنام قريرة العين.
    أندوشت رآسي من جلستي جنب السماعتين.
    وأنا جالسة أنتظر...شفت شمّللتْ الشغالين.
    إلاقاموا يمسحوا وإلا يغسلوا المواعين.
    وإلاجابوا أكياس زبالة يرموا فيهاالأكل والأوساخ مجتمعين.
    أستحرمت الأكل إللّي بيترمي في الزبالة مع المناديل.
    ومسكت شغالة من اللي بيشتغلوامتحمسين.
    وقلت لها : حرام ..لاكبوا أكل ودي مسكين.
    ولا كلي أنت وجماعتك الفلبين.
    قالت لي / نو..نو مافي أكل هادا إهنا.. هادا اكل مافي زين.
    قلت يرحم الله زمان كنتم فيه جيعانين.

    جيت لوحدة أعرفها من بيت العريس الموجودين .
    وقلت لها :خدوا معاكم من الأكل والطرطة ولا أعطوه مساكين .
    قالت: لانبغى كيك أو زفر وإحنا في السيارة محشورين.
    لاينكب علينا ويلغوصونا بزورة الشياطين.
    يادوب نرجع البيت وننام لنا شويتين.
    رجولنا أتفطرت من الهبد والشيل والحط وأخوات العريس متستتين.
    بكرة الصبّحى عند أهل العروسة ولازم نكون مستعدين.
    قلت أجل ياليتكم قلتوا للناس المتأخرين.
    ياخدوا معاهم أكل وهم رايحين .
    منها يفرحوا بيه عيالهم ومنها تحافظوا على نعمة رب العالمين.
    رن الجوال خرجت وأنا أقول:

    {{{الله لايزيل النعمة عننا وعنكم يامسلمين.}}}


    وضيح بعض الكلمات..
    ------------------

    معتازة : محتاجة.
    محتاسين : ملبوخين.
    يشن ويرن: كبير وعظيم وله سمعة
    مجغوها : زاد الحال بالسؤء
    مزعودة : كثيرة الضحك
    بولدة : شباب واولاد
    لطعة :انتظار
    مطفحينها : مملوءة
    حز : تاثرت
    مرطرط : موجودة بكثرة
    أستكري : أستاجر.
    شمّللتْ : خفت الحركة.
    ياهم ليلي : كلمة تقال للسخريّة إذا
    وضع الشي في غير محله.
     
  2. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    السلام عليكم ورحمة الله وبركاته

    الله يصبحكم بالخير
    ايش هادي التحف ياستي مكاوية بعسل ربي يحلي ايامك ان شاء الله

    ومشكورة على الاستنقااال

    صدقت والله بنت الصيرفية في كلامها وهو هادا اللي حاصل للاسف
    المشكلة في اختلاف الاجيال هو اللي مسبب لنا الصمرقع
    ومحنا عارفين كيف نتكيف مع الوضع الجديد

    اول حاجة الفشخرة الكدابة والسلف والدين علشان الجواز شي الله ما امر به
    والمصيبة الناس تتفاخر بشي ما تملكه ومهو من كيسها وتعبها وشقاها
    زي هداك اللي يتفاخر بعيال جاره وبكترتهم وهو عقيم

    وصدقوا اهل اول لمن قالوا
    ياتفتح بيتك وتفتخر والا قفله وانستر


    شغلة الزفة واللطعة اللي تحصل هادي اللي تفور دمي من الجوازات والمناسبات
    استغفر الله الواحد صار يحب يروح عزا ولا يروح فرح

    طيب ليش ماتراعو حال الناس اللي تعبان واللي ونيان واللي مايحب السهر الطويل
    ليش تجبرو الناس على شي ما يحبوه
    زفات وعصيرات وكيكات وشغلات كانت موجودة من زمان بس الزمن هادا
    يبغو يمجغوها بزيااااادة
    ونتصل على الاهل يالله اخرجو
    يقلك لساع باقي العصير
    ياستي اندري
    يقلك باقي الزفة والشعر
    ياهوووووه اندري
    يقلك باقي النصة
    يابنت الحلاااااال اندري
    يقلك باقي الميز
    كأننا مجوعينهم في البيت خلصو الطافوحلي وبرضهم جالسين
    طيب قاعدين ايش تسوو مو باقي الا تروحو معاهم البيت ولو مو الحيا تحضرو الدخلة معاهم
    صدق اللي قال الفرح للعروسة والعريس والجري للمتاعيس

    واللي يقهر بعد كل القعدة تلاقي الحريم يشتغلو في الطريق في الحش
    في الجواز واهله واللبس والميز وهادي فيها وهديك يخطيها

    قضية التوصيل في اخر الليالي مع السواقين او الاشخاص الغريبين والاجانب
    هادي ماحبيتها مرررررررررررررررة
    يعني بنت والا حرمة نادرة من فرح ولابسة من التهاويل المكشف والمقشع
    وكاسرة قارورة كلونيا على جتتها وتندر تبغى احد يرجعها بيتها

    قبل كم سنة بشكة حريم ندرو من فرح وجاهم راعي جمس وقلهم اوصلكم
    وراعي الجمس مركب تلاتة حريم في اخرة مقعدة ووحدة قدام
    ركبو الخمسة الحريم الباقين في النص
    وشويتين الحرمة اللي قدام والتلاتة اللي ورا طلعو رجال وماهم حريم
    وصياح ورجة جوة السيارة بس ربنا ستر عليهم

    اللي يسمع كلامي يفكرني ضد الفرح
    ويامحلى الفرح بالطريقة الاسلامية وتندر الحرمة هيا وبنتها محتشمة ولابسة
    بعضهم يحط الطرحة بس كدة حط يايعني قال ايه علشان شوشتها لا تتنبش وينفك المكر
    وحتى العباية تلبسها رفع عتب يقلك علشان لايتمرمص الفستان وتنعدم الفيونكة



    مزغودة بالغين بس نسيو النقطة


    مرطرط اللي نعرفها بس يمكن اللي كتبت الموضوع
    عندها لدغة في الراء والله العالم بدل ماتكتب رطرطة كتبت لطلطة

    سامحونا لو قروشنا راصكم بالهرج
    بس والله من كتر ما نسكت
    وااااااه ياقلبي ياكتكت قد ايش تشوف وتتألم وتسكت

    الفرح زمان كتبت موضوع عنه بس انحدف بسبب خراب
    في الموقع ونص مواضيع الاعضاء انحدفت
    حسب ما فهمت من مشرفنا ابو عمر

    وازا حصلتي يا مكاوية فرح قديم وعتقي اديني خبر

    وانتبهو ياناس على نفسكم لا تتخشلعو بزيادة في الفرح
    لانه هناك افضل مكان للحسد وضيقة العين
    وانتبهو من دعوة المرضانين والجيران وقدرو ظروفهم
    في المريض وفي الوجعان والمهستر
    علشان لا يدعي عليكم واحد وجعان بعدم التوفيق
    ويستجيب الله وينقلب الفرح لحزن البعيد وعدم توفيق

    والله يديم الافراح على الجميع
     
  3. مكاوية بعسل

    مكاوية بعسل تاجر مميز

    إنضم إلينا في:
    ‏2 يناير 2011
    المشاركات:
    346
    الإعجابات المتلقاة:
    0
    وعليكم السلام ورحمة الله ياسيدي [ الدهليز].
    أولاً: أضحك الله سنك مت من الضحك وأنا أقرأ تعليقاتك وخاصة مع أهلك وإنت ملطوع برة.
    ثانيا:ياريت الناس بعد ما تقرأ تعليقك القيم على مراعاة ظروف المعازبم ترحمهم من الحصار ويفكوا لهم الباب
    يخرجوا ومايبغوا ميز.لكن يقوا لك إحنا لمين مكلفين؟؟؟ طيب أرحموا الناس من طول الزفة ساعتين
    ثالثاً:ياسيدي أنا إللّي ناقلة الأبيات وماني لدغة بس إمكن من طوالها.طارت النقطة.أما كلمة لطلطة ورطرطة أظن انها بنفس المعنى ومن برحة لدحديرة إمكن تتغير.{ وأنا غيرت الكلمتين].في الأعلى .
    سيدي الدهليز / مشكور على الرد الممتع والمطعم بحكم ونصائح . مشكور من القلب وإن تحب الحكاوي . أنزل حكاية من حكاية الجدات في المرة القادمة ..
     
  4. احساس الغلا

    احساس الغلا &.غايتي عزة أمتي.&

    إنضم إلينا في:
    ‏6 سبتمبر 2009
    المشاركات:
    1,329
    الإعجابات المتلقاة:
    0
    الإقامة:
    Makkah
    خاصة في هالزمن يلا بس مشوا حالكم
    ههههههههههههههه
    الله يعطيك العافية قلبوووو
     
  5. مكاوية بعسل

    مكاوية بعسل تاجر مميز

    إنضم إلينا في:
    ‏2 يناير 2011
    المشاركات:
    346
    الإعجابات المتلقاة:
    0
    احساس الغلا... تحية طيبة.

    بس قد إيه نمشي الحال إللّي أشتكى من هذا الحال..

    مشكورة على الرد ..لا تقطعينا....
     
  6. شيماء حسن حسنين

    شيماء حسن حسنين تاجر مميز

    إنضم إلينا في:
    ‏29 ابريل 2009
    المشاركات:
    487
    الإعجابات المتلقاة:
    0
    ههههههههههههه
    انتى عسل اووووووووووى والله
     
  7. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    ياستي الله يسعدك ويبسطك طول عمرك ان شاء الله واللي يقول امين
    ايش نسوي نتطلع والا ما نتطلع كم مرة الناس تهرج وكم مرة نزكن لكن محد يسمع
    ازا كان الحريم يخلصو من عند المقينة على الساعة 12 ويجو الفرح

    والله ساعات احن على الحريم واحزن عليهم
    اسبوع والا اسبوعين قبل الجواز او المناسبة
    واحنا ندور ونبرم في السوق والدكاكين علين تجينا الدبرة في رجولنا
    وهادا حلو وهداك مو حلو وفي الاخير ننتش قماش وعلى الخياطة
    غلقنا من الفستان نجي لهيلمان الاكسسوار كنترة وشنطة ودبهرك
    وبعد كدة ليلة الجواز يروحو للمقينة يسوو شغلات وتنضيفات
    يوم الجواز يروحو من قبل العصر علين الساعة 9 مكياج وتساريح
    والدوخ والرجة والتعب والهلاك هادا كلو علشان ساعتين تلاتة

    وعلى ايه هادا كلو

    الجوازات دحين صارت استعراض محد سأل عن التوجيب او المشاركة في الفرح
    زمان الحرمة تخش نفسها في اي كرتة عندها والا تتسلف من اختها او جارتها
    وتحضر توجب وتسلم على اهل المناسبة وماعندهم الكلام دحين شافوه وهببوه

    اللي مخليني اهرج الكلام هادا لاني يوم المطرة القوية حقت الخميس
    معزوم في شبكة وحدة من الاقارب ودوخنا السبع دوخات

    حتى الاهل خليتهم يرجعو مع اقاربهم وخلصت الشبكة الساعة 6 صبح

    :ang::ang::ang::ang::ang:

    الجلسة صحيح حلوة بس ايش نسوي طول الليل وبالزات الايام هادي الليل طويل يفقع القلب
    ولافي ضومنة ولا كيرم نتسلى فيها بالزات الكيرم امووووووت فيه :p5088:
    اتعشيت فضلة خيركم وقربعت الشاهي وجيت ماشي


    اللدغة مو فيكي يامكاوية اللدغة والله العالم في بنت الصيرفي لانه هيا الكاتبة

    بس مدري بنت الصيرفي تسير اخت درويش اللي يدق العود :052: الله اعلم

    قصرو جمل الله حالك ستي مكاوية بعسل
    وربي يسعدكم ويهنيكم
    ويالله تعيشي وتجيبي وتسلمي على النغبشات الحلوة
    ندري المخشخش تحت الكرويتة والا فوق في السقيفة :021:
     
  8. مكاوية بعسل

    مكاوية بعسل تاجر مميز

    إنضم إلينا في:
    ‏2 يناير 2011
    المشاركات:
    346
    الإعجابات المتلقاة:
    0


    أخي الدهليز سلام الله على المكاااااوي قح....

    [[[[ويالله تعيشي وتجيبي وتسلمي على النغبشات الحلوة
    ندري المخشخش تحت الكرويتة والا فوق في السقيفة :021: ]]]

    والله متنا ضحك وإحنا مجتمعين نقرأ ردك..وأبشر جيك إللّي حتنفض منه الغبرة من قدمه.
     
  9. مكاوية بعسل

    مكاوية بعسل تاجر مميز

    إنضم إلينا في:
    ‏2 يناير 2011
    المشاركات:
    346
    الإعجابات المتلقاة:
    0
    شيماء حسن حسنينو ...وإنتي الشهد حبيبتي...
    مشكورة على الرد
     
  10. المكااااوي

    المكااااوي تاجر مميز

    إنضم إلينا في:
    ‏6 يونيو 2009
    المشاركات:
    520
    الإعجابات المتلقاة:
    0
    الله الله على الكلام الحلو والمرتب

    والله هذا الواقع والحاصل بدون مبالغه بل اليومين هذة صارت مصايب في الحفلات

    تسلم اناملك اختي الكريمه

    والموضوع متعه في متعه يبغاله والواحد يقراه يسوي عصريه مكسرات وشاي بحبق مكشكش

    والا إيش رأيك خويا الدهليز ولا تهون اختي مكاوية ولا الجميع
     
  11. مكاوية بعسل

    مكاوية بعسل تاجر مميز

    إنضم إلينا في:
    ‏2 يناير 2011
    المشاركات:
    346
    الإعجابات المتلقاة:
    0


    أخي الكريم /المكاااااوي .. أسعد الله أوقاتك..


    {{ والموضوع متعه في متعه يبغاله والواحد يقراه يسوي عصريه مكسرات وشاي بحبق مكشكش}}}.

    مشكور على هذا الثناء والحمدلله إنه عجبكم وعبارتك السابقة هي الدليل على حسن نقلي لكم ... وأعتبرها وسام على صدري..
    لاتطيل الغيبة بالرد فردكم يهمني ..

    أنا أعرف شاي بحبق عند كل الناس
    بس ممكن أفهم معني{{شاي بحبق مكشكش]]]

     
  12. المكااااوي

    المكااااوي تاجر مميز

    إنضم إلينا في:
    ‏6 يونيو 2009
    المشاركات:
    520
    الإعجابات المتلقاة:
    0
    ما سمعتي هذا اللي يقول


    فنجان شاي عليه كشكي ** غزال بالود كاويني

    يقول للقلب لا تشكي ** شكواك في القلب كاويني

    يعني مزبوط ميه ميه

    والحبق معروف
     
  13. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    صب واسقيني
    مرحبابك سيدنا مكاوي
    المكشكش والمرستك والمحكور والمزبوط كلها زي بعض
    بالزات لو كان شاهي على الفحم تشرب البراد ولو مو الحيا تلحس البراد من جوة
    وعلى قولة اهل اول اعصر البراد ياواد
    يجيب ملعقة السكر ويجلس يضغط التلقيمة والحتل ويعصرها ويمرصها علين اخر قطرة
    بس دحين ضهر ماينفع الشاهي كان شي سويلنا مسلوقة فول نابت تدفي صدرنا وتغسله
     
  14. مكاوية بعسل

    مكاوية بعسل تاجر مميز

    إنضم إلينا في:
    ‏2 يناير 2011
    المشاركات:
    346
    الإعجابات المتلقاة:
    0
    وعزت الله طلعت معاكم ماأفهم شي في هرجت اجدادي .وأرى نفسي ضئلة في بحر علمكم..

    كنت أعرف {{ لولاك ياسكر ماشربناك ياشاهي}} أما


    فنجان شاي عليه كشكي ** غزال بالود كاويني

    يقول للقلب لا تشكي ** شكواك في القلب كاويني...

    والله أول مرة أسمعه. بس حلو وأظنه مثل من
    الأمثال المرستكة...
    زيدونا من فيض كرمكم إخوتي المكاااوي والدهليز ومشكورين على الرد ..

     
  15. الدهليز

    الدهليز الـــــعـــــمـــدة العضوية الفضية

    إنضم إلينا في:
    ‏24 سبتمبر 2009
    المشاركات:
    9,634
    الإعجابات المتلقاة:
    4
    الجنس:
    ذكر
    الوظيفة:
    متسبب
    الإقامة:
    مكة الله يعمرها
    انتي شفتي شي
    دحين يجي مكاوي ويندر الخبايا والدسادس

    الله يجيبه بالسلامه له كم يوم غايب من غير شر
    بس فين حيروح السوق حيجيبه لنا

    وزي ماقال المسل يجيبك الصاج ياكربو
     

مشاركة هذه الصفحة