اللي مالحق الحج يدرمغ في غباره

السلام عليكم ورحمة الله وبركاته
اللهم صلي وسلم علي سيدنا محمد<O</O
الله يصبحكم بالخير جميعا حبايبنا التجار والتاجرات <O</O
الحج رزق لاهل مكة ولاهل المدينة <O</O
<O</O

اليوم 19 القعدة سبحان الله زمان كانوا يقولوا القعدة زي شعبان تجري وتمبرم الايام وتتـقـلفط قـلفطة غمض عين فتح عين يقلك لبيك والحج جا

دربكةالحج والاستعداد حق الحج يبدأ من نهاية شوال تلاقوا الناس اللي بدها تأجر بيتها فيالحج
من بدري يزبطوا البيت ويهتموا بيه اللي يبغالو بوية واللي يبغالو ترخيم ( يعني يجيبو الرخام ويملطو البيت من برا يسير يرجع جديد وأبيض زي البفتة يايعني منقلة الفلوس )

والمطوفين نفس الشي يرسلوا صبيانهم الكبار وبعضهم يسافرواعلشان يعربنو مع الحملدارية والمسؤولين عن الحج في بلادهم<O</O
ولكل مطوف خيمة يسموها البرزة زي ماتقولو دحين الحملات والمكاتب<O</O
وكل برزة فيها المطوف واولاده والشباب اللي شغالين معاه<O</O
ويقومو على راحة الحاجي من لمن يوصل من بلده علين يسافر<O</O
<O</O

وقبل الحج بعض الحجاج يروحو للمزارات ان كان في مكة او في المدينة<O</O
اللي للاسف اختفت كتيييييييييييييييييير من معالمها تحت مسمى البدعة !!!<O</O
قصرو<O</O

وياخدو التعاريف الا هيا اليوم يسمها العربون او جزء من المبلغ <O</O
اللي يتربط بها الادمي ومايروح لغيره يسيريعبوا نفسهم ويحسبوا حسابهم من بدري وهادا اييييييييييه الدنيا بالبركة كانت لكن كلشي مزبووووط ومحسوب ومية المية
ياعيني على الاخلاص في العمل والامانة :clapinghand:<O</O




المهم يسير يشترو الخيام والبسط والحنابل والتيازير والليانات والدوافير والطبخات يعني يستعدوا من إلى

طبعا الرجال قبل لايروحوا الحج للحج او الشغل كانو يمونو البيت بالأرزاق والمعلبات وكل الأكل
علشان القطعة تعرفوا أيام الحج محد في حال التاني وغير كدة يحسبو حساب الخوليف ( يوم 9 )
وكمانة الكم اليوم حقت منى ماكانوا يبسطو الدكاكين إلا بعد النزول 14 الحج يسير يغلقوا غلاق التعب مرة وحدة ويبسطوا مرة وحدة مو زي دحين ماشاء الله تبارك الله الناس تبسط وتبيع وتشتري وخصوصا دحين الحج زحمة واللي ماراح للحج يقل عقلو ياواد قوم فك الدكان واترزق الله احسن من قعدة البيت والمغاورة مع الحرمة وفوران الدم

يعني سبحان الله السنوات تجري ورا بعض والزمن أتغير يعني زي زمان أول ماكانت فيه هادي الزحمة والكركبة في الحج

ماشاء الله تبارك الله دحين قريب 2مليون او تلاتة مليون إن ماكان أكتر

يعني اول الناس كانت تخرج بسياراتها للحج
ويفرشوا الخيام حقتهم ويحجوا وكل شي أخدينو معاهم طبعا السيارات كانت قليلة واغلب الناس كانت تحج على الشقادف وهيا زي الصندقة الخشب يلبسوها بالقماش والستاير ويزبرقوها وتنحط فوق الجمال الحريم يركبوا في الجمب والبزورة يركبوا في النص والرجال يمشوا على رجولهم أو يركبوا جمال تانية واللي مايمديه يتشربط على الجمل يجيبولوا كرسي والا سلم صغير أحيانا الشقدف لمن يكون مليان بالدبب والناس المتان اللهم صلي على النبي بعض الجمال تجلس تورور وتصنقر من الحملة علشان كدة كانوا يوزعوهم على كم شقدف
ودايما المتان يركبوهم في النص
علشان لايميل الشقدف على واحد جمب وينطق ضهر الجمل والا يجيلو أبهر 5088:

راجعلكم ان شاء الله

 

الله يالدهليز

أيام زمان بركه وأهل البلد اللي كانوا رجال يشتغلوا ماهو زي يومنا هذا

ماحد يبغى يشتغل لا في حج ولا في غيرة

الشغل اللي أتكلم عنه اللي يترزق الله في الحج بسطه الا عربيه وغيرها
ماهي تكوه في المكتب واذا خرج يضيع في السوق

بس بيني وبينك المزارات صارت فيها شركيات وتبرك وكأنها تفيد وتنفع وهذا الإعتقاد الخاطئ

التراث حلو لكن كيف تفهم الحجاج العجم؟؟!

فما بالك بعض اهل البلد يعتقد في الخرزة الزرقا والقلاده ويعتقدوا أشياء غريبة

هذا خطأ كبير يعين هل الخرزة وغيرها من التراث والأماكن المقدسه تضر وتنفع بغير الله او هي وسيله للإستجابه او رد الضر؟
هذاالبلا ياأخويا الدهليز

بعضهم يقول ياخي بالبركه نعم البركه بس من الله ماهي بإعتقاد بجماد وخلافه

أنا مرت عليا كثير من الخزعبلات هذة

واحد جايب طينه من الرفض ويقول كلها تشفيك من 99 مرض

هيا هذا إيش تقول له ؟؟ تلسعه على عينه بالطينه حقته

والثاني يستغيث بارسول صلى الله عليه وسلم والثاني يتمسح بالباب

طيب النبي صلى الله عليه وسلم ما اقلل من شأنه ابداً لكن فين النبي صلى الله عليه وسلم
يعني اثره للأن موجود

طيب الباب من نحاس مصنوع قبل كم سنه يتبركوا فيه ويتمسحوا كأنه بيفيدهم

نرجع ياخويا على الحج وحلاوته أيام اول

وتتعلم من الحجاج أكلهم وعاداتهم علشان كده في مكه تلاقي انواع الطبخ والأكلات من كل جنس تاخذ حاجه

وغير اللغات

اليوم كله تقفيل وزحام وتتنكد من الدربكه اللي حاصله

وحااااااااااااااااااااال

 

أسعد الله صباحك يالدهليز شكراا ع التفاصيل والطرح الرائع:clapinghand:​

 

السلام عليكم ورحمة الله وبركاته
الله يمسيكم بالخير ان شاء الله

اشكر اللي شارك ونورنا في الموضوع
وان شاء الله ارد عليكم بس بعد ما اغلق من الموضوع
واتحملونا نكتب شويتين ونرتاح ونكمل معاكم واللي عنده اضافة او تصحيح او زكريات
يامرحباااااااااااااابه

وكانوا ياخدوا معاهم المعمول والغريبة والسمسمية والنقل ( مجمع المكسرات لوز بجلي فصفص ( كاجو فستق ) طبعا هادي جديدة ماكانت موجودة من زمان وياخدو كمانة قعقع عين الجمل زرنمباك)

وطبعا يوم العيد قيد الطلي معاهم ويدبحوه على طول وياكلوا منو طول مهم قاعدين في الحج ويسوو مشاوي والا سلالي لحم اوصال والكبدة والقلوب والفشة يشوحوها على الصاج وياكلوها مع عيش الحب وزلطة الطحينة
وملح وليمون وياربي لك الحمد والشكر

طبعا رجال مكة أول كلهم يندرو للحج يا يحجو أو يروحوا للشغل وتسير البيوت فاضية من الرجال(طبعا مو كلها تفضى في بعض الرجال يقعدوا في بيوتهم زي الكبار واللي وجعان واللي فتران ) والحريم علشان لاينفجعوا من الوحدة والهجبة وعلشان الدنيا سارت خليف الا هو يوم 9 فكانوا يتلمو مع بعضهم والا يروحوا ( يخلفو) يجلسوا مع أمهم وخالاتهم يعني يونسو بعضهم 3أسر4أسر يعني بشكة حريم علين لمن يغلق الحج كل مين يرجع لبيتو وكلها ماشية بالبركة وحجهم بالبركة

واللي صايم ينزل يفك ريقو في الحرم ويطوف ويصلي المغرب والعشا وفقييييع على البيت علشان خلاص مايجي نص الليل
إلا الناس والحجاج كركبو من منى على الحرم وترجع الزحمة

طبعا قبل لايروحو الحج من اول الشهر الحريم في البيوت
يمتهرو في المعمول والغريبة
هادي اكلتين مكاوية عريقة مايجي الحج الا ويخطر على البال المعمول والغريبة
وكانت كل ست بيت تتفن في تنقيش المعمول بالمنقاش
اللي يشبه ملقاط الشعر حق الحريم
وكانت في كمان القوالب الخشب
بس عيبها هديك تفضح لمن تمشو في الزقاق تسمع طااااااع طيييييييييع
يخبطو القالب في الدرجة حتى تندر حبة المعمول

وكانوا يتلمو في البيت الست الكبيرة وبناتها وحفيداتها
كلهم ماشاء الله يسوو المعمول وفي الاخير يرسلو للجيران وللاهلية وللرجال اللي
يبغى يروح الحج داعتو يتلبب ويفطر عليه
والغريبة مو كل مين يزبطها ولها اسرااااار في تسويتها وتتزين بالسكر البودرة واللوز البجلي


يالله نرجعلكم بكرة عمر وعافية

 

جزاك الله خير موضوعك جدآ شيق وذكريات جميلة للآسف الشديد الآن كل شئ تغير حتى طعم الحج أختلف عن

زمان في أنتظارك يادهليز دمت بصحة وعافية

 

موضوعكـ اكثر من رائع وتشكر عليه بجد
بس بصرااااحه والحق ينقال
كل ماجا شاب يشتغل منعته البلديه
لايبيع وولاشي لا والادهى ياخدوا اغراضه
مره شفت واحد شاب برمضان ساحبين منه عربيه كان يشتغل عليها يقول للعسكري
انا اجري على ايتام
يرد العسكري بكبر وغطرسه وعصبيه انتوا خربتوا البلد:214:
ليش خربوا البلد جالسين يسرقوا والا يبيعوا شي ممنوع
ويقولون بالاخر المسؤلين الشباب ليش عاطل ومنحرف
شي يبكي والله لاطقطق الواحد عالسياره ممنوع
ولاباع اي بيعه حلال برضوا ممنوع
ولااشتغل بالعربيات برضوا ممنوع
طيب اش يسوي طبيعي راح ينحرف او يجلس بالبيت عاطل كلامي واقعي ومابالغت بشي
بس اخ عالمسؤلين ومن جد الشبعان مايدري عن الجيعان
نسيوا ان فوقهم رب مايرضى بالظلم

 

موضوع جميل وذكريات حلوه
يعطيك العافيه

 

الله على كلامك اللي زي السكر

الله يعطيييييييييييك الف الف الف عافيه ياجدو الدهليز
والله موضوعك ومن غير مجاملات اكثر من رائع واسلوبك في الطرح ولا أروع

الله يسلم فمكــ....

 

دايما تتحفنا بمواضيعك اللي محد يقدر يفوتها
لانها مليانه حكم
وشغلات مفيده
ويكفينا اسلوبك الرائع
والله وانا اقراء كاني جالسه قدامك واسمعك
يعطيك الف عافيه
ولا يخلي المنتدى من امثالك

 

السلام عليكم ورحمة الله وبركاته
الله يصبحكم بالخير يا وجيه الخير

المواضيع ماتحلى الا بتواجدكم وليا رجعة معاكم ان شاء الله


حج اهل مكة كمان بالتصانيف يعني جالسيييين علينيوم 9 في بيوتهم وفي الضهر تصنفلهم ويقولوا لبعض يالله نحج يقولوا يالله
ويروحوايحجوا على طول وخصوصا إزا صادف زي الكم السنة اللي مرت الجو باااارد وحلو

علشان تعرفواإنو الشغلة كلها تسهيل وتوفيق من عند الله
يعني ساعات الواحد يستعد ويعبي نفسوويجهز طلباتو إلا الشغلة تسوق العكاااااس وبعدين ينطقو في بيوتهم
علشان كدة خلوأموركم بالتساهيل واللي ربنا رايدو رايح يسير
وبعد الحج يجي السؤال المعتاد بين الناس<O></O>

ها حجيت والا دجيت الدج يعني قاعد مطقوق في البيت

الحمد لله أهل مكة ربنا شرفهم بخدمة الحاج من أجداد أجداهم وعلين تقوم القيامة ربي لك الحمد والشكر
إنو خصنا بخدمة الحجاج والمعتمرين والزوار علشان كدة لازم اللي يخدم الحاجي يحط خوف الله في قلبو
ومايتجبر على الحجاج ويضحك عليهم ويغشهم مو علشان شي علشان ربنا يطرح البركة في الفلوس
اللي بتاخدوها يعني كانوا يبيعوا قارورة الموية ب4 وب5 قال أيش علشان نكسب وكاسة الشاهي بريالين
وهادا كمانة مهي مليانة ربعها فاضي وغير العصاير وغير وغير

لعلمكم بعض الحجاج يقعدو بالسنين وهم يجمعوا ويلملمو القرش على القرش ويحرموا نفسهم من حاجات كتييييرة علشان يحجو والدليل
شوفو اعمارهم كلهم كبار في السن الله يعطيهم العافية
المفروض تساعدوهم والله بيوت في مكة كانت تفتح بيوتها سبيل للحجاج
أو على القليل تراعيهم في الأجرة واللي ماعندو يقلو ياعمي تعال اسكن وكل ببلاش انت البركة حقتنا

واهل البيت اللي يأجرو بيوتهم كانوا يفلتو البيت بالكامل تحت تصرف الحجاج
ويطلعو الاهل والبزورة في الدور العلوي جهة الطيرما والخارجة مكان السطوح الايام هادي ولهم مطبخ صغير وحمام صغير اعزكم الله ويتحملو الكم اليوم هادي
بس علشان تجيهم قرشين حلوة


بس دحين للاسف اغلب الناس تقول والله انك غبي وابله
يا عمي اصنج الحاجي والا مو داري عن الاسعار وغش على كيفك

طيب من فين بدها تجي البركة في فلوس الحج :cnf3:

حتى اهالينا زمااان كان يحذرونا من دعوات الحجاج المظلومين لانها مستجابة
وكانوا يحرصو انو ما يخرج الحاجي من بيتهم الا وهو راضي ومبسوط
ويلزموه يدعيلهم

 

تسلم على الموضوع الجميل
بس الحين الزمن تغير ..
اول أهل مكة يحترون الحج
والحين لاجاء الحج تلقى نصهم مسافرين بره
وخايفين من الزحمة

 

كلام درر ...
اكيد مافي ولا اضافه بعد كلامك الممتع ...
وتسلم على المواضيع الشيقه ...
الله يعطيك الصحه و العافيه ...​

 

الله يعطيك العافية يالدهلـــــــــــــــــــيز

ذكرتني بكلام ستي الله يرحمها ويغفرلها

لماكنا نتجمع عند أمي تقولنا هه حجيتو ولادجيتو ونقولها دجينه

وتقعد تحكينا على القيس بس مااتزكر مظبوط إللي فاكرته أنو الحريم لما يروحو رجالهم الحج وهما في البيت لوحدهم

يتجمعو ويقعدو يطبلو ويغنو ياقيس ياقيس جا الحرامي وصرق التيس عشان الحرامي لايحسب البيت فاضي ويسرقه ..

ووحده تلبس زي الرجال والهرجة فيها لبس غزالة بس صراحه شكلها ايام توحفة عاد لوغلط عدلي وماننحرم من

مواضيعك المتمـــــــــــــــــــــــــــــــــــــــــــــــــــيزة..

 

حسبي الله على اللي يأذي الناس

خليهم يسوي طرزان على حقون المخدرات

 

وعليكم السلام ورحمة الله وبركاته

أمس سهرانه امي الله يحفظها وجو اخواتي وبزروتهم وسهره على المعمول

عاد هذا لوقت ماهو كله منقوش باليد فيه القوالب البلاستك

لكن لازم كم صينيه بالمنقاش والا ما يكون معمول العيد

وليومك هذا بالنسبه للخليف يوم تسعه الفطور عند الوالد اللي ما هو حاج يجي من العمات وعيالهم والبنات كلهم ببزورتهم لكن في البيت ماحد يخرج زي أول

كنت افتكر حتى لما نقلنا لمخطط كنت اوصل امي والبنات للجيران يجتمعوا الين الصبح وبعدها عاد

الاضحيه وتوزيعها وكرف